Jyl basynan beri Qazaqstanǵa jumys isteý úshin 6,3 myńnan astam reseilik kelgen. Bul týraly Eńbek jáne halyqty áleýmettik qorǵaý vitse-ministri Erjan Birjanov aitty, dep habarlaidy QazAqparat.
«Bizdiń ministrlik Ishki ister ministrligimen birlesip, kún saiyn sonyń ishinde UQK Shekara qyzmeti arqyly Qazaqstanǵa kelgenderdi jáne ketetinderdi ár el boiynsha, ár baǵyt boiynsha qadaǵalaidy. Eger Resei boiynsha naqty aitatyn bolsaq, onda 30 naýryz kúngi tańerteńgi jaǵdai boiynsha Qazaqstanda 101 myńnan astam reseilik bar. Onyń ishinde 6350 adam jyl basynan beri jumys isteý úshin kelgen», - dedi Erjan Birjanov Ortalyq kommýnikatsiialar qyzmetinde tilshilerdiń saýalyna bergen jaýabynda.
Onyń aitýynsha, bul sandar reseilikterdiń Qazaqstanǵa aǵylyp kelip jatqanyn bildirmeidi. Máselen, ótken jyly Qazaqstanǵa kelgen RF azamattary 18,8 myń adam bolǵan.
«Qorqynysh kóp, bizdegi jumys oryndaryn sheteldikterdiń iemdenetini týraly kóp aitylady. Biraq tájiribe kórsetkendei, onyń jaǵymdy jaqtary da bar. QR tsifrlyq damý, innovatsiialar jáne aeroǵarysh ónerkásibi ministrliginiń bastamasymen elimizge joǵary bilikti mamandar, aýqymdy IT-kompaniialar kelip jatyr. Máselen, inDriver Qazaqstanǵa keldi, keńsesin ashady. Bul bilimniń, biliktiliktiń importy. Odan nege qorqamyz? Qazaqstandyqtar úshin seminarlar aiasynda aýqymdy qarajatqa koýchter shaqyrylady. Qazir mundai iri kompaniialar bizge kelip, qazaqstandyqtardy jumys isteýge úiretse nemese osy jerde kásiporyndar ashsa, bul qosymsha jumys oryndary jáne biýdjetke tólenetin qosymsha salyq bolady», - dedi Birjanov.
