2021 jyldyń 6 aiynda Eńbek, áleýmettik qorǵaý jáne kóshi-qon komitetiniń óńirlik departamentteri júrgizgen tekserý barysynda áleýmettik infraqurylymnyń 379 nysanynda QR «Múgedekterdi áleýmettik qorǵaý týraly» jáne «Arnaýly áleýmettik qyzmetter týraly» zańdaryn 1918 ret buzý deregi anyqtaldy, dep habarlaidy "Ult aqparat".
Birinshi jartyjyldyqta memlekettik basqarý, densaýlyq saqtaý, mádeniet jáne kóliktik qyzmet kórsetý salalaryndaǵy nysandarda zańbuzýshylyqtardy anyqtaý boiynsha, onyń ishinde múgedektigi bar adamdar úshin qoljetimdi ortany qamtamasyz etý turǵysynan 469 baqylaý is-sharasy ótkizildi. Osy oraida 312 tekseris josparly aldyn alý-baqylaý aiasynda jáne 157-si azamattardyń ótinishteri negizinde jospardan tys júrgizildi.
Tekserý qorytyndysy boiynsha QR «Múgedekterdi áleýmettik qorǵaý týraly» zańynyń 1603 buzylýy jáne «Arnaýly áleýmettik qyzmetter týraly» zańynyń 315 buzylýy anyqtaldy.
Bul rette 1,5 myńnan astam zańbuzýshylyq múgedekterdiń áleýmettik jáne kólik infraqurylymy nysandaryna, mádeni-oiyn-saýyq uiymdary men sport ǵimarattaryna kirip-shyǵýyn qamtamasyz etpeýmen bailanysty bolyp otyr.
Tekserýler nátijesinde múgedektigi bar adamdardy áleýmettik qorǵaý jáne olarǵa arnaýly áleýmettik qyzmet kórsetý salasynda anyqtalǵan zańbuzýshylyqtardy joiýǵa 379 nusqama berildi, olardyń 71-i boiynsha jalpy somasy 7,4 mln teńgege ákimshilik aiyppul salyndy.
