«5:32» serialyn túsirgen Salem social media kompaniiasy Asqar Jaldinovtyń málimdemesine jaýap berdi, dep habarlaidy QazAqparat.
«Ótken táýlikte birneshe BAQ Salem komandasy men Álisher Ýtev bastaǵan serial óndirýshileri jáne stsenarii avtorlary intellektýaldyq menshik nysanyn urlady degen aiyptaýlar jariialaǵanyn baiqadyq. Osy oraida, kelesidei málimdemeler jasaimyz: Salem social media men Álisher Ýtev dál qazirgi sátte eshqandai sotqa deiingi narazylyq alǵan joq; Asqar Jaldinovtyń tarapyna intellektýaldyq quqyq buzýshylyq joq, kitap ta, serial da elimizdiń kriminaldy tarihyna bailanysty oqiǵalar men faktilerdi sýrettegen. Oqiǵalar men faktiler týraly aqparat avtorlyq quqyqpen qorǵalmaǵan. Oqiǵalar men faktilerdiń shyǵarmashylyq interpretatsiiasyn kez kelgen adam jasai alady», - dep jazylǵan kompaniia hatynda.
Sonymen birge, Salem kompaniiasy kerisinshe, óziniń aýdiovizýaldy quqyǵy buzylǵanyn málimdedi. «5:32» serialynyń videofragmentteri kitaptyń jarnamasynda qoldanylǵanyn alǵa tartady.
«Urlyqqa qatysty aiyptaýlar tutas komandanyń, jobany óndirýshilerdiń jumysyn joqqa shyǵarady, kompaniianyń iskerlik bedeline jáne veb-serial avtorlarynyń ary men abyroiyna nuqsan keltiredi.
«5:32» serialynyń stsenarii negizinde jatqan oqiǵalar shynaiy ómirden alynǵan, shynaiy faktilerge qurylǵan. Bul qoldanystaǵy hronikalar, olardy ár túrli qainarkózder ashyq qoldanady jáne interpretatsiia men kórkem shyǵarma óndirisinde kez kelgen adam qoldana alady.
Salem óz iskerlik bedelin jáne intellektýaldy menshikke qatysty quqyǵyn qorǵaýǵa múddeli», - dep habarlady Salem social media.
Buǵan deiin «Protokoldan tys. Qazaqstandaǵy atyshýly qylmystar qupiiasy» kitabynyń avtory Asqar Jaldinov «5:32» serialyn túsirgenderdi sotqa bergenin habarlaǵan edi.
Aita keteiik, «5:32» serialynda qatygez adam óltirý qylmysyn ashyp, maniaktardy ustaǵan qazaqstandyq politseiler týraly baiandalady. Serial 1990 jyldary bolǵan shynaiy oqiǵalarǵa negizdelgen. Basty rólderde Ábilmansur Serikov pen Marat Ámiraev oinaidy.
