Koronavirýs infektsiiasynyń taralýymen kúres sheńberinde tótenshe jaǵdai engizilgennen bastap qazirgi ýaqytqa deiin 4 708 sheteldik kólik quraldary elge ákelingen, onyń ishinde 500 kólik quraly áli de Qazaqstan Respýblikasynyń aýmaǵynda tur.
Bul týraly QR QM Memlekettik kirister komitetiniń baspasóz qyzmeti habarlady.
Baspasóz qyzmetiniń málimetterine qaraǵanda, koronavirýs infektsiiasynyń taralýyn boldyrmaý jáne onyń aldyn alýǵa baǵyttalǵan sharalardy qabyldaý sheńberinde, jeke tulǵalardyń memleketterdiń shekara arqyly erkin óte almaýy saldarynan Eýraziialyq ekonomikalyq odaq alqasynyń 2020 jylǵy 29 sáýirdegi №47 sheshimi qabyldanǵan bolatyn. Qabyldanǵan sheshimge sáikes sheteldik avtokólik quraldaryn (EAEO elderiniń kólik quraldaryn qospaǵanda) ýaqytsha ákelgen jeke tulǵalar úshin ýaqytsha ákelý merzimi 2021 jyldyń 31 qyrkúiegine deiin uzartylǵan.
Qazaqstan azamattary Eýraziialyq ekonomikalyq odaq aýmaǵynda Belarýs Respýblikasy men Resei Federatsiiasy avtokólikterine senimhat arqyly ýaqytsha ákelý merzimin esepke almai júre alady. Degenmen, Armeniia Respýblikasy men Qyrǵyz Respýblikasynyń kólik quraldaryna senimhat arqyly basqarý quqyǵy berilmeidi (bundai quraldardyń sanattary sheteldikter bolyp sanalmaidy).
Shetel azamattary turǵylyqty eline qaitý jáne kólik quraldaryn shyǵarý úshin memlekettik shekaradan ótýge múmkindigi bar, sondai-aq shetel azamattary, ózderi shyǵarýǵa múmkindigi bolmaǵan jaǵdaida osy quraldardy tasymaldaýshylardyń kómegimen shyǵara alady.
Osy kólik quraldaryna qatysty, ýaqytsha ákelý merzimi aiaqtalǵannan keiin, buzýshylyqtardy anyqtaý boiynsha sharalar Qazaqstan Respýblikasy Ishki ister ministrliginiń Ákimshilik politsiia komitetiniń qyzmetkerlerimen birlese otyryp júzege asyrylatyn bolady.
Sondyqtan, sheteldik avtokólik quraldary Eýraziialyq ekonomikalyq odaq aýmaǵynan shyǵarylýy kerek. Sebebi, sheteldik avtokólik quraldaryn shyǵarý týraly talaptar Eýraziialyq ekonomikalyq odaqtyń barlyq elderiniń aýmaǵynda qoldanylady.
2020 jylǵy naýryzdan bastap (elde koronavirýs infektsiiasynyń taralýymen kúres sheńberinde tótenshe jaǵdailar engizilgennen bastap) qazirgi ýaqytqa deiin 4 708 sheteldik kólik quraldary tirkelgen. Onyń ishinde Qazaqstan Respýblikasynda 500 kólik quraly baqylaýda tur.
Aita keteiik, avtokólik quraldary kelesidei memleketterden ákelingen: Ázerbaijan, Aýǵanystan, Bosniia jáne Gertsegovina, Germaniia, Grýziia, Islandiia, Ispaniia, Litva, Moldova, Polsha, Sloveniia, Tájikstan, Túrkmenstan, Ózbekstan, Ýkraina jáne Frantsiia.
«Eger zań buzýshylyqtar anyqtalsa, jeke tulǵalarǵa qatysty qajetti sharalar júrgizý úshin osy kólik quraldary aiyppul turaǵyna ornalastyrylady. Sondai-aq, ýaqytsha kólik ákelý merzimi ótkennen keiin Eýraziialyq ekonomikalyq odaqtyń qoldanystaǵy zańnamasy sheńberinde jeke tulǵalarda kedendik tólemderdi tóleý mindettemesi týyndaidy. Tólemder aýmaqtyq memlekettik kirister organy qyzmetkerlerimen esepteletin bolady», - dep eskertti Memlekettik kirister komitetiniń baspasóz qyzmeti.
