Biyl 5 jastan bastap 0-synypqa qabyldanǵan balalar «Álippe»/«Býkvar» jáne «Matematika» pánderin oqityn bolady. Bul jaiynda Májilis depýtattarynyń resmi saýalyna jaýap bergen QR Premer-Ministri Baqytjan Saǵyntaev málim etti, dep habarlaidy "Ult aqparat".
Úkimet basshysy óz jaýabynda búgingi kúni «Pedagog mártebesi týraly» jáne «Oqýshy men muǵalimniń júktemesin tómendetý máseleleri boiynsha keibir zańnamalyq aktilerge ózgerister men tolyqtyrýlar engizý týraly» zań jobalaryn ázirleý jónindegi jumys toby qurylǵandyǵyn atap ótken.
«Zań jobalaryn ázirleý aiasynda 5 jastan bastap 0-synypqa qabyldaýdy júzege asyrý máselesi pysyqtalýda. 0-synypty orta bilim berý qurylymyna engizý qajet. Sebebi bul deńgei 5 jastan kem emes jáne 7 jastan aspaityn jas aralyǵy aiasynda «Bastaýysh bilim» bilim berýdiń halyqaralyq standarty jikteýishi (BHSJ) deńgeiine sáikes keledi. 0-synypta oiyn tehnologiialaryn qoldana otyryp jáne birinshi synypqa kóshý kezinde sabaqtastyqty qamtamasyz etetin balalardyń jas erekshelikterin eskere otyryp, «Álippe»/«Býkvar» jáne «Matematika» pánderin oqytý josparlanýda», - dedi Premer-Ministr.
Onyń atap ótýinshe, balalardy 0-synypqa daiarlaý olardyń eske saqtaý qabiletterin, logikalyq oilaýyn, qoldyń usaq motorikasyn, monologtik sóileý tilin, toppen jáne juppen jumys jasai bilýin, sondai-aq balanyń erte jastan damýy úshin mańyzy zor kommýnikativtik daǵdylardy damytýǵa múmkindik beredi. Sabaqtastyqty qamtamasyz etý maqsatynda 1-synyptyń oqý baǵdarlamalary 0-synyptyń oqý baǵdarlamalarynyń engizilýin eskere otyryp, qaita qaralatyn bolady. 0-synypta jumys jasaityn barlyq pedagogter arnaiy biliktilikti arttyrý kýrstarynan ótedi.
«2018 jylǵy 5 qazannan Elbasy Joldaýyn júzege asyrý aiasynda Mektepke deiingi bilim berý sapasyn joǵarylatý boiynsha jol kartasy ázirlendi. Onda biryńǵai biliktilik talaptaryn, ulttyq biliktilikti testileýdi engizý kózdelgen jáne mektepke deiingi uiymdardyń tárbieshileri men basqa da jumysshylarynyń eńbekaqy júiesi qaita qarastyrylǵan. Sondai-aq, 0-synypta jańartylǵan baǵdarlama boiynsha jumys jasaityn pedagogterge tiisti qosymsha aqy qarastyrylatyn bolady. Zań jobasy qabyldanǵannan keiin memlekettik jalpyǵa mindetti bilim berý standartyna jáne oqý baǵdarlamalaryna tiisti ózgerister engizilip, ol pedagogikalyq qaýymdastyqpen jáne ata-analarmen kelisiledi», - dedi B.Saǵyntaev.
