Jeke investitsiia tartýda elimizdiń 12 óńirinde oń ósim baiqalady. Bul týraly búgin Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Aýyl sharýashylyǵynda 3,1 paiyz deńgeiinde turaqty ósim baiqaldy. 13 óńirde oń serpin kórinip otyr. Mal men qus eti, siyr sútin óndirýdiń artýy esebinen Aqmola oblysy eń joǵarǵy ósýdi kórsetti. Bul rette, taýyq jumyrtqasy óndirisiniń tómendeýine bailanysty Atyraý jáne Soltústik Qazaqstan oblystarynda tómendeý tirkeldi», - dedi 2021 jyldyń qańtar-aqpanyndaǵy elimizdiń áleýmettik-ekonomikalyq damý qorytyndysy jaiynda baiandaǵan ministr.
Sonymen qatar ol 7 ekonomikalyq kórsetkish boiynsha óńirlik bólinistegi jalpy jaǵdaiǵa toqtaldy.
«6 kórsetkish boiynsha Almaty oblysy jáne 5 kórsetkish boiynsha – 6 óńir oń ósim kórsetti. Olar Aqmola, Aqtóbe, Shyǵys Qazaqstan, Qaraǵandy, Qostanai oblystary, sondai-aq Shymkent qalasy. 8 óńirde 4 kórsetkish boiynsha ósý tirkeldi. Bul ortasha deńgei. 2 óńirde 2-3 kórsetkish boiynsha oń ósim baiqalady. Bul rette, saýda boiynsha oń aimaqqa Almaty oblysy, kólik boiynsha Atyraý oblysy endi», - dedi Áset Erǵaliev.
Ministr jeke investitsiialardy tartý boiynsha 12 óńirde oń ósim baiqalatyndyǵyn, onyń ishinde 6 óńirde ósim 20 paiyzǵa joǵary ekendigin aitty.
«Sonymen qatar, Batys Qazaqstan, Atyraý, Pavlodar, Qyzylorda jáne Mańǵystaý oblystaryna investitsiialardy tartý boiynsha jumysty jandandyrý qajet. Atalǵan óńirlerde jeke investitsiia tómendeýi baiqalýda», - dedi ol.
