Memleket basshysy Qasym-Jomart Toqaevtyń tapsyrmasymen bólingen 5 myń áleýmettik bilim grantyn jergilikti atqarýshy organdar konkýrstyq negizde úlestiredi. Bul úshin oblys, respýblikalyq mańyzy bar qalalar men astana ákimderimen konkýrstyq komissiialar qurylatyn bolady, dep habarlaidy "Ult aqparat".
QR Bilim jáne ǵylym ministrliginen málim etkendei, granttarǵa kópbalaly nemese ataýly áleýmettik kómek kórsetiletin otbasylardan shyqqan balalar úmitker bola alady.
5 myń bilim granty óńirlerge ártúrli bólingen. Atap aitqanda, Nur-Sultan qalasyna - 165, Almaty qalasyna – 190, Shymkent qalasyna – 390, Almaty oblysyna – 540, Aqmola oblysyna – 390, Aqtóbe oblysyna – 180, Atyraý oblysyna – 220, ShQO-ǵa – 180, Jambyl oblysyna – 460, BQO-ǵa – 100, Qaraǵandy oblysyna – 195, Qostanai oblysyna – 85, Qyzylorda oblysyna – 390, Mańǵystaý oblysyna – 305, Pavlodar oblysyna – 75, SQO-ǵa – 60 jáne Túrkistan oblysyna 1345 grant bólinip otyr.
Konkýrsqa qatysý úshin 2019 jylǵy maýsym aiynda ótkizilgen UBT-da shekti ball jinaý mańyzdy bolyp tabylady.
«Ulttyq joǵary oqý oryndaryna túsý úshin ulttyq biryńǵai testileý nátijesi boiynsha – keminde 65 ball, basqa joǵary oqý oryndaryna – keminde 50 ball, «pedagogikalyq ǵylym» baǵyty boiynsha – keminde 60 ball jinaý kerek.
Konkýrsqa qujattar 5 men 10 tamyz aralyǵynda qabyldanady.
Bilim granttaryn taǵaiyndaý jáne joǵary oqý oryndaryna qabyldaý 25 tamyzǵa deiin júrgiziledi», - dedi QR BǴM-nan.
Grant iegerleriniń tizimin ákimdik jergilikti buqaralyq aqparat quraldarynda jariialaityn bolady.
Eske salaiyq, Memleket basshysy Qasym-Jomart Toqaevtyń tapsyrmasymen kópbalaly jáne az qamtylǵan otbasylardyń balalaryna 5 myń bilim granty bólindi.
«Ázirshe 5 myń, odan keiin bul júie jumys isteitin bolsa, kóre jatarmyz», - dedi Q.Toqaev. Prezident bul jumystyń mańyzdy elementi áleýmettik az qamtylǵan halyqtyń ishinen talantty balalar men jasóspirimderdi oqytý jáne joǵary oqý oryndaryna túsýge daiyndaý júiesi bolatyndyǵyn basa aitty.
