Almaty qalasy boiynsha Qarjylyq monitoring agenttiginiń departamenti memlekettik satyp alý salasyndaǵy alaiaqtyq faktisi boiynsha tergeýdi aiaqtady, dep habarlaidy ult.kz.
Tergeý málimetinshe, «KazStroyOpyt LTD» JShS-niń basshysy konsaltingtik qyzmet kórsetý syltaýymen kompaniialarǵa qurylys salasyndaǵy jumys tájiribesin qoldan jasap berý shemasyn uiymdastyrǵan.
Kúdiktiler «Elektrondyq depozitarii» júiesine oryndalǵan jumystar men nysandardy paidalanýǵa berý týraly jalǵan aktiler engizip otyrǵan. Sonyń arqasynda keibir kompaniialar memlekettik satyp alýǵa qatysý kezinde negizsiz artyqshylyqqa ie bolǵan.
Atalǵan shema áleýmettik jeliler men túrli internet-platformalar arqyly ashyq jarnamalanǵan.
QMA málimetinshe, qylmystyq top quramynda 11 adam bolǵan. Sonymen qatar Shymkent qalasynyń Sáýlet, qala qurylysy jáne jer qatynastary basqarmasyndaǵy laýazymdy tulǵalarǵa jalǵan jumys tájiribesin rastaǵany úshin zańsyz syiaqy jetkizip otyrǵan deldaldar anyqtalǵan.
Tergeý barysynda qylmystyq tabysty zańdastyrý úshin baqylaýdaǵy birneshe zańdy tulǵa paidalanylǵany belgili boldy. Olar arqyly aqsha jinalyp, keiin qolma-qol aqshaǵa ainaldyrylyp otyrǵan.
Aldyn ala esep boiynsha, qylmystyq tabys kólemi 490 million teńgeden asqan.
Sondai-aq jalǵan jumys tájiribesin paidalanyp, memlekettik satyp alýǵa qatysqan 56 kompaniia anyqtalǵan. Qazir bul materialdar tekserý júrgizý úshin ýákiletti organdarǵa joldandy.
Is boiynsha úsh kúdikti qamaýǵa alyndy. Taǵy segiz adamǵa qatysty eshqaida ketpeý týraly qolhat túrindegi bultartpaý sharasy qoldanylǵan.
Qylmystyq is sotqa joldandy.
