QR Bilim jáne ǵylym ministrligi joǵary oqý oryndary jetekshilerimen memlekettik bilim grantyn ala almai qalǵan 45 «Altyn belgi» iegerin tegin oqytý múmkindigin talqylady, dep habarlaidy Baq.kz QR BǴM baspasóz qyzmetine silteme jasap.
Bul igi bastamany onshaqty qazaqstandyq JOO rektorlary qoldap, búgin olardyń bólgeli otyrǵan granttyq oryndarynyń sany da belgili boldy.
Sonymen, Ál-Farabi atyndaǵy Qazaq Ulttyq ýniversiteti – 10, Turan ýniversiteti – 10, E.Bóketov atyndaǵy Qaraǵandy memlekettik ýniversiteti – 1, Qazaq memlekettik zań ýniversiteti – 15, Narhoz ýniversiteti – 3, S. Demirel atyndaǵy ýniversitet – 2, Abylai han atyndaǵy Qazaq halyqaralyq qatynastar jáne álem tilderi ýniversiteti - 1, Almaty menedjment ýniversiteti – 1, M.Áýezov atyndaǵy Ońtústik Qazaqstan memlekettik ýniversiteti – 2 oryn bólip otyr.
QR Bilim jáne ǵylym ministrligi joǵary oqý oryndarynyń mundai bastamany qoldap, qoǵamǵa, jumys berýshiler men túlekterge kórsetken áleýmettik jaýapkershilik úlgisi úshin alǵysyn bildirip otyr. Óitkeni, úzdik oqyp, UBT barysynda «Altyn belgige» laiyq joǵary bilim deńgeiin rastaǵan mektep túlekteri oqýyn tegin jalǵastyrý múmkindiginen airylýy múmkin edi. Mundai jaǵdai «Altyn belgi» ieleriniń básekelestik deńgeii joǵary, ári memlekettik tapsyrysy az bólinetin mamandyqtardy tańdaýynan týyndap otyr.
Osylaisha, biyl memlekettik bilim grantynan qaǵylǵan 45 «Altyn belgi» iegeriniń 19-y ekonomikalyq, 8-i – halyqaralyq qatynastar, 14-i – zańgerlik, 4-i – aýdarmashylyq mamandyqtaryn tańdaǵan. Al elimizde memlekettik bilim granttarynyń negizgi bóligi eńbek naryǵynda suranysy joǵary, el ekonomikasyna asa qajetti tehnikalyq jáne tehnologiialyq mamandyqtarǵa, atap aitqanda, kólik tehnikasy, qurylys, radiotehnika, elektronika, telekommýnikatsiialar, nanotehnologiialar siiaqty mamandyqtarǵa bólinip otyr.
.jpeg)