Shyńjańdaǵy "saiasi lagerlerdiń" biri. Pekin ony resmi túrde "kásipke baýlityn ortalyq" dep ataidy.
43 el Qytaidy adam quqyǵy baqylaýshylaryna Shyńjań avtonomiialyq ólkesine kirýine ruqsat berýge shaqyrdy. Birneshe jyldan beri halyqaralyq qaýymdastyq Pekindi atalǵan ólkede musylmandardy jappai qýdalap, genotsid jasady dep aiyptap keledi. Pekin muny joqqa shyǵarady.
21 qazanda 43 eldiń ókili qol qoiǵan málimdeme Pekindi adam quqyǵy baqylaýshylaryna, onyń ishinde BUU-nyń adam quqyǵy jónindegi Joǵarǵy komissary da bar, Shyńjańǵa "dereý ári erkin" kirýine jaǵdai jasaýǵa úndeidi, dep habarlaidy Azattyq.
Málimdeme avtorlary Shyńjańdaǵy jaǵdaiǵa alańdap otyrǵanyn aityp, "million adam qamalyp shyqqan saiasi tárbieleý lagerleri" jaily senimdi derekkózderge súienedi.
Ortaq málimdemege AQSh, Eýroodaq elderi, Aziianyń birqatar memleketteri jáne ózge elder qol qoiǵan.
Qytaidyń BUU-daǵy ýákili Chjan Tsziýn aiyptaýlardy joqqa shyǵaryp, bul "Qytaidyń bedelin qurtý maqsatynda ózara sóz bailasyp jasalǵan áreket" dep baǵa berdi.
Qytai buǵan deiin saiasi lagererdi "kásipke baýlityn ortalyq" dep atap, atalǵan oryndar adamdardy terrorizmnen aiyqtyrýǵa kómektesedi dep aitqan.
Degenmen adam quqyǵyn qorǵaýshylar men lagerde qamaýda bolǵan adamdar ortalyqta azaptaý men qysym baryn, onyń túrmege kóbirek uqsaitynyn aitqan.
