Memleket basshysy Qasym-Jomart Toqaev tótenshe jaǵdai jónindegi memlekettik komissiia otyrysynda tótenshe jaǵdai kezinde tabysynan aiyrylǵandarǵa járdemaqy tólenetinin aitqan edi. Prezident tótenshe jaǵdai kezinde tabysynan aiyrylǵandarǵa eń tómengi jalaqy mólsheri (42 500 teńge) kóleminde ai saiynǵy tólem engizýdi tapsyrdy. Osy oraida, búginde Qazaqstannyń ár aimaǵynan birneshe qazaqstandyq atalmysh áleýmettik kómekti alyp úlgerdi. Sonyń biri - Pavlodar qalasyndaǵy "Avtovokzalservis" shekteýli jaýapkershiligi bar seriktestiginde anyqtamalyq kassirshi qyzmetin atqaratyn Áliia Serikbaiqyzy. Ol qiyn kezde qarjylai kómek kórsetken memleketke alǵysyn bioldirdi, dep habarlady Strategy2050.kz tilshisi.
"Avtovokzalservis" shekteýli jaýapkershiligi bar seriktestigi qyzmetkeriniń sózinshe, mekemedegi jumys ýaqytsha toqtatylǵannan keiin, mekeme basshylyǵy áleýmettik tólemdi alýǵa qyzmetkerlerin ózderi usynǵan.
"1 sáýirden bastap jumys ýaqytsha toqtady. Oblystar arasynda avtotasymaldaý jalǵasty. Al shet memleketter arasyndaǵy avtotasymaldaý oǵan deiin toqtatyldy. Alǵashynda Reseige baratyn avtotasymaldaýdy japty, keiinnen oblystar arasyndaǵy da tasymaldaýdy toqtatty. Bizge mundai áleýmettik tólemge ótinish berýdi basshylyq aitty. Biz esepshot ashtyryp, olarǵa nómirin jiberdik", - dedi Áliia Serikbaiqyzy.
Sonymen birge ol bul qarajattyń az ekendigin, degenmen azyq-túlik satyp alýǵa jetkilikti ekenin atap ótti.
"Qazirgidei qiyn kezde úkimettiń azamattaryn nazardan tys qaldyrmai, qarjylai járdem jasaýyn úlken kómek dep bilemin. Bul 42 500 teńge jetedi dep aita almaimyn, máselen, kommýnaldy qyzmetterdi tóleý kerekpiz. Degenmen azyq-túlik alýǵa, basqa da turmysqa qajetti zattardy satyp alýǵa ǵana jetkilikti. Osyndai múmkindik berip otyrǵan memleketke rizashylyǵymdy billdiremin", - dedi mekeme qyzmetkeri.
Aita keteiik, jalpy bul kómekti keminde 1,5 millionnan astam azamat alady dep josparlanýda.
