Eńbek jáne halyqty áleýmettik qorǵaý ministrligi 42500 teńge áleýmettik tólemdi alýǵa ótinimdi birneshe qaitara jibermeýdi surady, dep bhabarlaidy "Ult aqparat".
Vedomstvodan málim etkendei, 42500 teńgeni alýǵa ótinimdi birneshe ret berý málimetterdi qaraý merzimin uzartyp jatyr.
«Bastapqyda ótinimderdi qarap, derekterdi tekserý merzimi 7 jumys kúni dep belgilengen edi. Osy oraida, tólemderdi tezirek júrgizý úshin ótinimderdi qaraý barysy 3 jumys kúnine deiin qysqartyldy. Bul rette, atap óterligi, kóptegen azamattar ótinimderin birneshe qaitara joldap jatyr. Máselen, 8 sáýir túngi 23.00-degi jaǵdai boiynsha, kelip túsken 3,1 million ótinimniń 1,3 milliony ekinshi qaitara jiberilgender», - dedi ministrlikten.
Barlyq ótinim sanalýan derekter qorynda muqiiat súzgiden ótedi. Onyń ishinde adamnyń aty-jóni, JSN men bank shotynyń nómiri, jumysyna qatysty maǵlumattar jiti tekseriledi.
Eńbek ministrliginiń aqparatyna sáikes, 42 500 teńge járdemaqyny alýǵa jumys istep júrgen jáne tólemdi berý qarastyrylmaityn sanattaǵy azamattar ótinim bergen. Olar eskirgen nemese ózge bireýdiń bank shottaryn kórsetken. Sonymen qatar, marqum bolyp ketken nemese shetelde turatyn tulǵalardyń atynan da ótinim beriletini belgili bolyp otyr. Ótinim joldaýshylar arasynda áleýmettik saqtandyrý júiesine eshqashan qatyspaǵan, oǵan qarajat aýdarmaǵan azamattar da bar. Mundai 405 myńnan astam jaǵdai anyqtaldy.
Osyndai jaǵdailardy anyqtap, qaitalanyp jiberilgen ótinimderdi alyp tastaý úshin kelip túsken barlyq 3,1 mln ótinimniń barlyǵyn qarap shyǵý qajet.
«Osylaisha ótinimdi qaraý merzimi sozylyp ketýi yqtimal. Sondyqtan, azamattardan, 3 jumys kúninen soń tólemdi taǵaiyndaý týraly habarlama almasańyzdar da alańdamaýlaryńyzdy suraimyz. Ár ótinish boiynsha aqparat tekserilgennen keiin mindetti túrde ótinim joldaýshyǵa qabyldanǵan sheshim jaiy jetkiziledi. Tólem jasaý týraly sheshim qabyldanǵannan keiin ótinish berýshige SMS-habarlama keledi. Keiinnen ótinish berýshiniń derekterin Memleketik áleýmettik saqtandyrý qory «Azamattarǵa arnalǵan úkimet» memlekettik korporatsiiasyna jiberedi, ol ony ekinshi deńgeidegi bankterge tólem júrgizý úshin baǵyttaidy. Buǵan deiin de habarlaǵanymyzdai, áleýmettik tólem alýǵa ótinimdi eGov portaly, 42500.enbek.kz veb-saity jáne https://t.me/Help42500Botmekenjaiy boiynsha Telegram-bot arqyly berýge bolady. Azamattardan ótinimdi bir ret qana joldaýdy suraimyz», - dedi ministrlikten.
Esterińizge sala keteiik, TJ kezeńinde tabysynan aiyrylǵan jaǵdaida Memlekettik áleýmettik saqtandyrý qorynan aiyna 42 500 teńge mólsherinde beriletin áleýmettik tólem kelesi sanattarǵa beriledi:
– shaǵyn jáne orta kásipkerlik sýbektileriniń jalaqysy saqtalmaityn demalystaǵy qyzmetkerlerine;
– karantin engizilgen eldimekenderde qyzmetin júzege asyratyn iri kásipkerlik sýbektileriniń jalaqysy saqtalmaityn demalystaǵy qyzmetkerlerine;
– memlekettik mekemelerdi qospaǵanda, kommertsiialyq emes zańdy tulǵalardyń jalaqysy saqtalmaityn demalystaǵy qyzmetkerlerine;
– jeke kásipkerlerge;
– dara tájiribemen ainalysatyn adamdarǵa (notariýs, jeke sot oryndaýshysy, advokat, kásibi mediator);
– biryńǵai jiyntyq tólemdi tóleýshiler bolyp tabylatyn jeke tulǵalarǵa;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdarǵa.
