Elde jariialanǵan tótenshe jaǵdaiǵa bailanysty búginge deiin 216 myńnan astam adamǵa 42500 teńgeden tólem taǵaiyndaldy. Tólemder Memlekettik áleýmettik saqtandyrý qorynan (MÁSQ) iske asyrylady, dep habarlaidy "Ult aqparat".
«216 922 adamǵa TJ kezeńinde tabysynan aiyrylýyna bailanysty Memlekettik áleýmettik saqtandyrý qorynan áleýmettik tólem taǵaiyndaldy», - dedi Memlekettik áleýmettik saqtandyrý qorynan.
Málim etilgendei, 8 sáýir saǵat 14.00-degi jaǵdai boiynsha, 42500 teńgeden áleýmettik tólem alý úshin 1 mln 688 myń 131 azamattan barlyǵy 2 mln 755 myń 866 ótinish túsken. Iaǵni 1 mln 67 myń 735 ótinish qaitalanyp jiberilgen.
«Ótinishterdi qaraý merziminiń ulǵaiýyna jol bermeý maqsatynda azamattardan ótinishti bir ret qana jiberýdi suraimyz», - dedi qordan.
Azamattardyń jeke málimetterin tekserý jáne ótinishti qaraý merzimi 3 jumys kúnin quraidy. MÁSQ-ta tólem jasaý týraly sheshim qabyldanǵannan keiin ótinish berýshige SMS-habarlama keledi. Keiinnen ótinish berýshiniń derekteri «Azamattarǵa arnalǵan úkimet» memlekettik korporatsiiasy» KEAQ-ǵa jiberiledi. Ol ony ekinshi deńgeidegi bankterge tólem júrgizý úshin jiberedi.
Áleýmettik tólem alýǵa ótinimdi eGov portaly, 42500.enbek.kz vebsaity jáne Telegram-bot arqyly berýge bolady.
Eske salaiyq, elde tótenshe jaǵdaidyń jariialanýyna bailanysty tabysynan aiyrylǵan kelesi sanattaǵy azamattar aiyna 42 500 teńge mólsherinde áleýmettik tólem ala alady:
–shaǵyn jáne orta kásipkerlik sýbektileriniń jalaqysy saqtalmaityn demalystaǵy qyzmetkerlerine;
– karantin engizilgen eldi mekenderdegi iri kásipkerlik sýbektileriniń jalaqysy saqtalmaityn demalystaǵy qyzmetkerlerine;
– memlekettik mekemelerdi qospaǵanda, kommertsiialyq emes zańdy tulǵalardyń jalaqysy saqtalmaityn demalystaǵy qyzmetkerlerine;
– jeke kásipkerlerge;
– jeke praktikamen ainalysatyn adamdarǵa (notariýs, jeke sot oryndaýshysy, advokat, kásibi mediator);
– biryńǵai jiyntyq tólemdi tóleýshiler bolyp tabylatyn jeke tulǵalarǵa;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy (budan ári – AQS) sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdarǵa júzege asyrylady.
