QR Eńbek jáne halyqty áleýmettik qorǵaý vitse-ministri Nariman Muqyshev 42 500 teńge kólemindegi áleýmettik tólemdi alýdaǵy jaýapkershilik máselesin túsindirip berdi, dep habarlaidy QazAqparat.
«Búgingi kúni áleýmettik jelide eń kóp talqyǵa túsip jatqan taqyryptyń biri – 42 500 teńgeni alǵan kezdegi jaýapkershilik. Ol jaily jazǵan adamdardyń kóbi yzaǵa berilip, odan bas tartý kerek pe, álde nelikten az somaǵa bola qatań baqylaý qoiylǵan degen syńaida oilaryn bildirip jatyr. Bul suraqtardyń nege kóbeiip ketkenin túsinýge bolady. Máseleni túsindire keteiin», - dep Facebook-paraqshasynda jazǵan Nariman Muqyshev mynadai stastistika keltiredi.
Qazirgi tańda elimizde 3,3 mln adamǵa 42 500 teńgelik áleýmettik tólem taǵaiyndalǵan. Ótinim alǵash qabyldana bastaǵaly beri 20 kúnniń ishinde ǵana osynsha adam qamtylǵan. Vitse-ministr bul rette áleýmettik tólem shynynda da TJ kezinde kirisin joǵaltqan adamdarǵa berilýi kerektigin eske salady. Alaida, kirisin joǵaltpaǵan ári qashyqtan jumys istep jatqan adamdardyń ózi ótinim berip jatqan kórinedi.
«Bálkim bireý jai ǵana teskerip kórýdi, al ekinshisi qosymsha kiris alǵysy kelgen bolar. Qazir TJ rejimi bolǵandyqtan biz qujattar paketin surap jatqan joqpyz. Ótinim eń qarapaiym jolmen berilgennen keiin biz ony avtomatty túrde qarap, sheshim qabyldaimyz. Osymen is bitti. Alaida, «jalǵan málimet» bergen adammen jaýapkershilik birge erip júredi. Sol sebepti kirisin joǵaltpaǵan jáne atalmysh tólemdi suraǵan adamdarǵa jaýapkershiliktiń baryn eskertip jatyrmyz», - deidi ol.
Eńbek jáne halyqty áleýmettik qorǵaý vitse-ministri atap ótkendei, eger áleýmettik tólemdi qatelesip alǵandar ony qaitaratyn bolsa, olar jaýapkershilikke tartylmaidy.
«Eger siz TJ kezinde jumystan aiyrylyp, atalmysh tólemdi alsańyz – demek bári durys, bizdiń taraptan eshqandai suraq týyndamaidy. Al eger tabysyńyzdy joǵaltpai, atalmysh tólemdi alsańyz – azamattyq jaýapkershilikti tanytyp, atalmysh tólemnen bas tartýdy suraimyz. Onda eshqandai suraq týyndamaidy. Eger ailyq alyp jatqannan keiin BJT tólegenińizben, TJ-ǵa bailanysty jumystan bosap, aýdarym men salyqty aýdarmasańyz, 42 500 teńge sizge tiesili. Bizdiń taraptan eshqandai ýáj bolmaidy», - dedi ol.
Eske sala ketsek kúni keshe Memlekettik komissiianyń shuǵyl shtaby 42 500 teńge tólemin taǵaiyndaý erejesindegi ózgeristerdi jariialaǵan bolatyn. Al QR Eńbek jáne halyqty áleýmettik qorǵaý ministrligi tólemdi qaitarýǵa nietti adamdar ony bankterdiń smartfondaǵy qosymshasy arqyly jasai alatynyn málim etken edi.
