Memleket basshysy Qasym-Jomart Toqaev memlekettik qoldaýǵa, kúrdeli shaqta áleýmettik qoldaýǵa, laiyqty zeinetaqyǵa – bolashaqta tek resmi jumys istep, salyq tóleitin azamattar ie bolatynyn eskertti, dep habarlaidy "Ult aqparat".
«Áleýmettik saiasat aspektisiniń birine toqtala ketkim keledi. Jańa áleýmettik tólemdi alý shartarynyń biri – biryńǵai jiyntyq tólem (BJT) tóleý boldy. Áleýmettik tólemdi alǵan azamattardyń 40 paiyzy – BJT-ny birinshi ret tólegender. Bul – shynynda da memlekettik kómekke muqtaj azamattar. Olardy ekonomikaǵa barynsha tartý kerek. Bul adamdar qaitadan «kóleńkege» ketip, óz problemasyn betpe-bet qalýynyń aldyn alý kerek», - dedi Prezident Tótenshe jaǵdai rejimin qamtamasyz etý jónindegi memlekettik komissiianyń otyrysynda.
Memleket basshysy memlekettik qoldaýǵa, kúrdeli shaqta áleýmettik qoldaýǵa, keleshekte laiyqty zeinetaqyǵa – tek resmi jumys istep, salyq tóleitin azamattar ie bolatynyn eske saldy.
«Mine sol sebepti ýaqytsha jumyssyz qalǵan azamattar men dál osy sanattaǵy azamattar – Úkimet pen ákimderdiń jiti nazarynda bolýy tiis. Naryqtyq ekonomika aiasynda jumystan ýaqytsha kez kelgen adam aiyrylyp qalýy múmkin. Osyǵan bailanysty Úkimet eńbek naryǵyndaǵy tirkeýdi barynsha jeńildetip, protsedýralardy qysqartyp, jumyssyz qalý mártebesi men tiisti tólem berý isin jeńildetýi tiis», - dedi Qasym-Jomart Toqaev.
