QR Premer-Ministri Asqar Maminniń tóraǵalyǵymen ótken Úkimet otyrysynda eldiń 2020 jylǵy qańtar-naýryzdaǵy áleýmettik-ekonomikalyq damý qorytyndysy jáne respýblikalyq biýdjettiń atqarylýy qaraldy. «Samuryq-Qazyna» UEQ» AQ kompaniiasynyń kórsetkishteri týraly Qordyń basqarma tóraǵasy Ahmetjan Esimov baiandady, dep habarlaidy "Ult aqparat" primeminister.kz saityna silteme jasap.
A. Esimovtiń aitýynsha, qazirgi jaǵdai ekonomikanyń barlyq salalaryna áserin tigizdi, Qor qyzmetkerleri de onyń teris yqpalyn sezindi. Eń aldymen, munaigaz sektory, áýe jáne temirjol tasymaly, energiia resýrstaryn tasymaldaý jáne t.b.
«Biylǵy jyldyń birinshi toqsanynyń qorytyndysy boiynsha jaqsy nátijelerge qol jetkizildi, keibir kórsetkishter boiynsha ótken jylmen salystyrǵanda ósim bar. Munai-gaz salasy syrtqy faktorlardyń yqpalyna qaramastan, birshama turaqty. Birinshi toqsannyń qorytyndysy boiynsha ónerkásiptik kórsetkishter munai óndirý kóleminiń 102%-ǵa asyra oryndalýymen qamtamasyz etilip, 6 mln teńgege jýyqty qurady», — dep habarlady Qor basshysy.
A. Esimov esepti kezeńde 4,3 mln tonna nemese josparly kórsetkishten sál tómen munaidyń qaita óńdelgenin atap ótti, biraq bul ótken jylǵy deńgeiden 30%-ǵa artyq. Gaz tasymaldaý kólemi 24,4 mlrd kýbometrdi qurady, bul jospar deńgeiinde, biraq ótken jylǵy kórsetkishten 10%-ǵa joǵary.
«Júk segmenti birshama turaqty, júk ainalymynyń oryndalmaýy 6% quraidy, biraq ótken jylǵy deńgeide saqtaldy. Soǵan qaramastan, kólemin arttyrýǵa naqty perspektivalar bar. Biz Qytaidan keletin júkterdiń tranzittik jóneltilýiniń jandanǵanyn baiqap otyrmyz», — dedi A. Esimov.
Biyl naýryz aiynda tranzit kólemi ótken jyldyń aqpan aiymen salystyrǵanda 30%-ǵa ósti, elektr energiiasy eksportynyń kólemi birshama artty, Qytaidan poshta jóneltilimderiniń tranzitin iske asyrý qalpyna keltirilip jatyr. Telekommýnikatsiia sektory turaqty jumys isteýde.
«Aǵymdaǵy kezeńde Qazaqtelekom jelilerine túsetin júkteme 30%-ǵa deiin artty, bul kompaniia kórsetetin qyzmetterdiń kólemininiń ulǵaiǵanyn kórsetedi», — dedi A. Esimov.
Sonymen qatar, ótken jyldary Qor $8 mlrd kóleminde syrtqy qaryzdy ýaqytynan buryn ótep, tómendetti, al bul valiýta baǵamyn eskersek, baǵam aiyrmashylyǵynan shamamen 1 trln teńge kólemindegi áleýetti shyǵyndy quraidy.
«Bul sonymen qatar qaryzǵa qyzmet kórsetý úshin jyl saiynǵy qajettilikti 269 mlrd teńgege tómendetýge múmkindik beredi, biraq bul jetkiliksiz, sondyqtan óndiristik protsesterge tikelei yqpal etpeitin operatsiialyq jáne basqa da shyǵystardy ońtailandyrý boiynsha aýqymdy jumystar júrgizilýde», — dedi ol.
A. Esimovtiń aitýynsha, bul sharalar úzdiksiz óndiristik protsesti qamtamasyz etý úshin munaiǵa aǵymdaǵy baǵalarmen qarjylyq beriktiktiń belgili bir qoryn qurýǵa múmkindik beredi.
Qor Ulttyq bankpen valiýtalyq túsimdi satý jáne shetelderden depozitterdi qaitarý boiynsha Úkimettiń qaýlysyn júzege asyrý boiynsha qabyldanyp jatqan sharalardy kelisti.
«Jalpy, kompaniialardaǵy jaǵdai iskerlik, jumys turaqty júrip jatyr. Óndiristik qyzmetkerler qysqartylǵan joq, jalaqy tóleý boiynsha kidirister joq, kásiporyndarda qaýipsizdik talaptary men sanitarlyq-epidemiologiialyq baqylaý normalary saqtalǵan», — dedi Qor basshysy.
Buǵan deiin turǵyn úi jáne kommertsiialyq jyljymaityn múlikti jalǵa alýshyǵa 2,3 mlrd teńge somasyna jaldaý tólemderin osy jyldyń 1 maýsymyna deiin keiinge qaldyrý týraly sheshim qabyldandy. Jeńildikter 37 myń azamatqa qatysty bolady. Sonymen qatar, Densaýlyq saqtaý, Ishki ister, Eńbek jáne halyqty áleýmettik qorǵaý ministrlikterine 500 mln teńge somasyna qorǵanys maskalaryn satyp alýǵa qarjy bólindi.
