Búgin Almatydaǵy Dostyq úiinde QR Densaýlyq saqtaý ministri Eljan Birtanovtiń qatysýymen «Halyq densaýlyǵy jáne densaýlyq saqtaý júiesi týraly» Kodeks jobasyn talqylaýǵa arnalǵan «dóńgelek ústel» ótti, dep habarlaidy QazAqparat.
Otyrys barysynda mamandar transplantologiia máselesin tilge tiek etti.
Zań jobasy boiynsha jumys tobynyń tóraǵasy, QR Májilis depýtaty Záýresh Amanjolova transplantologiiaǵa qatysty jumys tobynyń pozitsiiasyn jetkizdi.
«Transplantatsiia óte kerek. Bul, meditsinanyń jetken jetistiginiń aiǵaǵy. Biz de Qazaqstannyń jetken jetistigimen maqtanýymyz kerek. Bizde talantty hirýrgtar óte kóp. Biraq sońǵy jyldary donorlyq kórsetkish tómendep ketti. Búginde 3200 adam aǵzasyn aýystyrýǵa kezekte tur. Olardyń 70 paiyzyna búirek kerek. 250-i balalar. Al bizde balalar transplantologiiasy múlde joq», - dedi Májilis depýtaty.
Onyń aitýynsha, endi adam músheleri shetelge jiberilmeidi, jiberilse tek Qazaqstan azamattaryna ǵana.
Jańa kodekske sáikes, ólgen adamnyń múshesin donorlyqqa berý úshin mindetti túrde jaqyn týysynyń nemese jubaiynyń (eriniń) kelisimi qajet etiledi.
Jumys tobyna osy taqyrypta 1 myńǵa jýyq hat kelgen.
«2006 jyldan bastap men basqaratyn qor muqtaj balalardyń organdaryn aýystyrýǵa ota jasaýǵa kómektesip keledi. Biz kóbinese shetelge shyǵamyz. Biraq sońǵy ýaqytta shetelde bizdiń balalarǵa aǵzany berýdi shektei bastady. Qazir tek Úndistanǵa barýǵa bolady. Biraq ol jaqta da úlken kezek. Balalar da, úlkender de meditsinalyq kómek alýǵa, ómir súrýge quqyǵy bar», - dedi QR balalar quqyǵyn qorǵaý jónindegi ýákil Arýjan Sain.
Esterińizge sala keteiik, QR Májilisiniń spikeri Nurlan Nyǵmatýlin «Nur Otan» partiiasy fraktsiiasynyń keńeitilgen otyrysynda jańa kodeks jobasyn talqyǵa salǵan bolatyn.
Fraktsiianyń keńeitilgen otyrysynda Densaýlyq saqtaý kodeksi jobasynyń árbir normasy jan-jaqty, tereń talqylandy.
