Qazaqstandaǵy AQSh elshisi Ýiliam Mozer eki el arasyndaǵy 30 jyldyq diplomatiialyq qarym-qatynastar týraly pikir bildirdi, dep habarlaidy QazAqparat.
«Biyl biz Qazaqstan men AQSh arasyndaǵy diplomatiialyq qatynastardyń 30 jyldyǵyn atap ótemiz. Qazaqstannyń táýelsizdigin alǵash tanyǵan memleket retinde biz bul mereitoidy birge atap jatqanymyzdy maqtan tutamyz. Anyǵynda biz qarym-qatynasymyzdaǵy mańyzdy oqiǵalar týraly aqparatty áleýmettik jelide bólisip bastaǵanbyz jáne bir jyl boiy osy tarihi sátterdi jariialaýdy jalǵastyramyz», - dedi Ý. Mozer AQSh elshiligi
Sonymen birge elshi burynǵy Memlekettik hatshy Beikerdiń fotosýretin kórsetti. Ol 1991 jyly 17 jeltoqsanda, iaǵni, táýelsizdik alǵan kúnniń ertesine Qazaqstanǵa kelgen.
«Bul resmi sapar bizdiń qarym-qatynasymyzdyń sol kezde qanshalyqty mańyzdy bolǵanyn aiqyn kórsetedi. Bizdiń «30 jyl birge» naýqanymyz tek ótkendi ǵana meńzemei, bolashaqqa degen múmkindik retinde qarastyratynymyzdy da bildiredi. Otyz jyldyq yntymaqtastyq Amerika Qurama Shtattary men Qazaqstan arasyndaǵy qatynastarǵa oń áser etti jáne bailanystarymyz burynǵydan da berik bola tústi. Prezident Baiden aitqandai, «Birge alǵa qaraimyz» jáne AQSh pen Qazaqstan arasyndaǵy dostyq pen seriktestik tek nyǵaia túsetinine kámil senimdimin», - dedi AQSh elshisi.
