Qazaqstandyq qoldanýshylardyń 30 myńnan astam Telegram-akkaýntynyń jeke derekteri jelige tarap ketti, dep habarlaidy "Ult aqparat" Memlekettik tehnikalyq qyzmetke silteme jasap.
«Memlekettik tehnikalyq qyzmet» AQ KZ-CERT Kompiýterlik intsidentterge áreket etý qyzmeti Internettiń qazaqstandyq segmentine monitoring jasaý barysynda Telegram-akkaýnttardyń birinen Telegram messendjerin qoldanýshylardyń jeke derekteri týraly 744 myń jazba jinaqtalǵan faildy tapty.
Taldaý barysynda failda qoldanýshynyń ID-i, aty, tegi, telefon nómiri jáne «ózim týraly» baǵanyndaǵy qoldanýshynyń jazbasy syndy jeke derekter bar ekeni anyqtaldy. Onyń ishinde 30 myń akkaýnt qazaqstandyq telefon nómirlerine tirkelgen bolyp shyqty», - dep málim etti «Memlekettik tehnikalyq qyzmet» AQ KZ-CERT baspasóz qyzmeti.
Fail tabylǵan Telegram-kanaldyń avtory ony «Glaz Boga» TMD-daǵy iri servisiniń (1 mln-nan astam qoldanýshy) klientter bazasy dep bergen. Ol áleýmettik jeli, messendjerler, izdeý júieleri men basqa derekkózder negizinde jinalǵan qoldanýshylardyń jeke derekterin suraý boiynsha alýǵa múmkindik beredi.
Memlekettik tehnikalyq qyzmet mamandarynyń túsindirýinshe, jeke derekterdiń jelige ketýi alaiaqtardyń aqparatty áleýmettik injeneriiada, atap aitqanda, jeke jáne banktik derekterdi alý maqsatymen habarlasý jáne habarlama jiberýde paidalaný qaýpin týdyrady.
«Osyǵan bailanysty Internettiń qazaqstandyq segmentiniń barlyq paidalanýshylaryna kibergigiena saqtaýdyń mańyzyn eske salamyz, sonymen qatar Internette ózińizdiń jeke derekterińizdi engizý kezinde muqiiat bolyp, úshinshilerge jeke aqparatty bermeýdi suraimyz», - dedi «Memlekettik tehnikalyq qyzmet» AQ KZ-CERT baspasóz qyzmeti.
