Úsh kúnniń ishinde elimizde 294 páter urysy ustaldy. Bul jaiynda QR IIM Kriminaldyq politsiia departamenti bastyǵynyń orynbasary Qanat Nurmaǵambetov málim etti, dep habarlaidy QazAqparat.
«Mamyrdyń 19-21 kúnderi aralyǵynda elimizde «Páter» shartty ataýymen keń aýqymdy is-shara uiymdastyryldy. Is-sharany ótkizýge kriminaldyq jáne ákimshilik politsiia qyzmetkerleri jumyldyrylyp, olar atalǵan kezeńde 238 páter urlyǵyn ashty. Qylmystyq jaýapkershilikke 294 páter urysy, onyń ishinde 22 top tartyldy», - dedi ol Ishki ister ministrliginiń baspasóz qyzmeti alańynda ótken brifing barysynda.
Onyń atap ótýinshe, urlanǵan zattar satylatyn 1 500-den astam oryn tekserildi. Buǵan deiin páter urlyǵy úshin izdeýde júrgen 8 qylmysker, 67 kúdikti ustaldy. Máselen, Qostanai qalasynda buǵan deiin isti bolǵan 2 jergilikti turǵyn qolǵa tústi. Olar plastik terezelerdi buzý arqyly 4 páterdi tonaǵany anyqtalyp otyr.
«Kúdiktiler keltirgen shyǵyn 1,5 mln teńgeden asyp túsedi. Sonymen qatar olardyń urlanǵan altyn buiymdardy lombardtar arqyly birden satyp jibergeni anyqtaldy», - dedi Qanat Nurmaǵambetov.
