Shymkenttegi keramikalyq taqta shyǵaratyn zaýytta grek-rim kúresinen Qazaqstannyń burynǵy chempiony, 28 jastaǵy Tilektes Ádil qaiǵyly jaǵdaida kóz jumdy, dep habarlaidy ult.kz.
Marqumnyń dosynyń aitýynsha, jumys kezinde sportshy abaisyzda elektr symyna tiip, toq soqqannan keiin biikten qulaǵan. Oqiǵa ornyna kelgen dárigerler onyń ómirin saqtap qala almady.
Politsiia atalǵan fakti boiynsha sotqa deiingi tergeý bastaǵan.
Tilektes Ádil bala kezinen kúrespen ainalysyp, estý qabileti buzylǵan sportshylar arasyndaǵy jarystarda Qazaqstan namysyn qorǵaǵan. Ol 2018 jyly 55 kelige deiingi salmaqta respýblikalyq spartakiadada, 2019 jyly 60 kelide eresekter arasyndaǵy el chempionatynda altyn medal jeńip alǵan.
Marqumnyń artynda jubaiy men eki balasy qaldy.
