«Alataý» dástúrli óner teatrynyń kinozalynda Uly Otan soǵysynyń jetpis eki jyldyǵyna orai Almaty qalasy ákimdiginiń, «Qazaqfilm» AQ uiymdastyrýymen «28 Panfilovshylar» (rej. A. Shalopa) filminiń qaiyrymdylyq kórsetilimi ótti.
Atalmysh film jaýyngerlerimizdiń erligin máńgilik esten shyǵarmaý maqsatynda «Eshkim de, eshqashan da umytylmaidy!» degen uranmen Uly Otan soǵysy jáne eńbek ardagerlerine arnalyp qoiyldy.
Kinotýyndyda Uly Otan soǵysy jyldaryndaǵy Orta Aziialyq áskeri ortalyqta (Almaty q.) general-maior Ivan Vasilevich Panfilovtyń basshylyǵymen qurylǵan 316-atqyshtar diviziiasynyń Máskeý túbindegi erligi jaily baiandalady.
Kinokórsetilim «Alataý» dástúrli óner teatrynyń kinoqyzmet bóliminiń jetekshisi Rita Halelqyzynyń alǵy sózinen bastaý aldy. Kórsetilim barysynda ádisteme bóliminiń jetekshisi Ǵaliia Naǵimanqyzy shaǵyn baiandama jasap, keshegi tarihyn umytpaǵan eldiń ǵana bolashaǵy jarqyn bolatynyn aitty. Elimizdi qorǵaǵan sarbazdardy bir minýt únsizdikpen eske alyp, qurmet bildirgennen soń jinalǵan ardagerlerge arnalǵan film usynyldy. Kórermender arasynda ata-analary sol oqiǵalardyń kýágeri bolǵandar da kezdesti.
Filmnen alǵan áserlerin aita kele «Shańyraq-2» Ardagerler alqasynyń tóraǵasy Qoblanov Marat bylai dedi:
– Búgingi kórgen filmnen «28 panfilovshylar» áskerleriniń, shyn máninde, óz halqynyń naǵyz batyrlary ekenine taǵy bir márte kýáger boldyq. Jaýmen shaiqasta shekaramyzdy qorǵaý úshin qanshalyqty alparysqandary jaqsy baiandalǵan. Mine, naǵyz elge degen súiispenshilik pen erliktiń naqty úlgisi!
Filmnen óte qatty áser aldyq. Ásirese, sońǵy epizodtar eriksiz kózimizge jas keltirdi. «28 panfilovshylar» erligi Uly Otan soǵysy kezinde erekshe oryn aldy. Bul Panfilovshylardyń qaisarlyǵy – qazirgi jastar úshin batyrlyq pen joǵary patriottyq seziminiń jarqyn úlgisi. Sol batyrlarymyzdyń erligi, ójettigi barsha jastarǵa ónege, – dep óz pikirimen bólisti «Alataý» aýdanynyń ardagerler keńesiniń tóraǵasy Jazitov Tegisjan.
Búgingi beibit kúnge jetkizgen maidangerlerimizdiń erligi eshqashan umytylmaidy. Osylaisha ardagerlerimiz uiymdastyrýshylarǵa rizashylyqtaryn bildirip, elimizge beibitshilik tiledi. Esterińizge sala keteiik, «28 Panfilovshylar» filmi Qazaqstan Respýblikasynyń Mádeniet jáne sport ministrligi men Resei mádeniet ministrliginiń qoldaýymen túsirilgen bolatyn.
"Ult aqparat"
