2019 jyldyń 26 qańtarynda Astana - Temirtaý», «Almaty - Qapshaǵai», «Almaty-Qorǵas» avtojoldary aqyly tártipke aýysady, dep habarlaidy "Ult aqparat" Qazavtojolǵa silteme jasap.
Aqyly júiege aýysýy respýblikalyq mańyzy bar avtojoldardyń sapasyn jaqsartýǵa, apat qaýpin azaitýǵa, logistikalyq dálizderdi jetildirýge yqpalyn tigizedi.
«2019 jyldyń 26 qańtarynda Astana - Temirtaý» (134 shaqyrym), «Almaty - Qapshaǵai» (42 shaqyrym), «Almaty-Qorǵas» (295 shaqyrym) avtojoldarynda aqy alý júiesi iske qosylady. Kóliktik infraqurylymdy damytý JIÓ arttyrýǵa, avtojoldardy jóndeý men kútip ustaýǵa múmkindik beredi», - dep habarlandy Qazavtojol saitynda.
Atap ótken jón, aqyly jol bólikterine jaqyn aýdandardyń turǵyndary úshin túsindirý men habarlaý jumystary júrgizilgen. Birqatar qoǵamdyq tyńdaýlar, kóshpeli tanystyrylymdar uiymdastyrylyp, tólem stavkalary týraly turǵyndardyń usynysy tyńdalǵan.
«Aqyly jol bólikterine jaqyn aýdandardyń turǵyndary úshin bir jyldyq abonement baǵasy 1000 teńge bolady. Ony sol mekenjaida tirkelgen avtokólik ieleri ǵana ala alady. Eger kólik iesi ǵana belgilengen mekenjaida tirkelip, avtokóliktiń tirkelý orny basqa bolsa, tólemaqy jalpy erejelerge sáikes alynady», - delingen resmi habarlamada.
Jeńil kólik ieleri Astana-Temirtaý jolynda aldyn ala 200 teńge nemese qolma-qol 400 teńge tólep óte alady. Almaty - Qapshaǵai jolynda aldyn ala - 100 teńge nemese qolma-qol - 200 teńge bekitilgen. Almaty-Qorǵas jolynda aldyn ala - 300 teńge, qolma-qol 600 teńge tóleý qajet.
