25 aqpan kúni emdelýge beriletin birjolǵy zeinetaqy tólemderin alýǵa ótinish berýge arnalǵan portal iske qosylady. Bul týraly «Otbasy bank» AQ tóraǵasy Lázzat Ibragimova aitty, dep habarlaidy QazAqparat.
«Búgin atalǵan ereje (Emdelýge beriletin birjolǵy zeinetaqy tólemderin paidalaný erejesi) resmi túrde jariialanyp, kúshine enedi. Bizdiń portal 2021 jyldyń 25 aqpanynda iske qosylady. Sońǵy jańashyldyqtardy ózgertý úshin bizge úsh kún ýaqyt qajet. Bastapqyda tizimge qosylǵan keibir aýrý túrleri sońǵy ýaqytta alynyp tastalǵan bolatyn», - dedi Lázzat Ibragimova Ortalyq kommýnikatsiialar qyzmetindegi baspasóz máslihaty barysynda.
Al QR Densaýlyq saqtaý ministrliginiń Meditsinalyq kómekti uiymdastyrý departamenti direktorynyń orynbasary Gúlnar Sársenbaeva birjolǵy zeinetaqy tólemderin emdelýge paidalaný QR azamattaryna qosymsha meditsinalyq qyzmetter alýǵa múmkindik beretindigin aitady.
«Ony alý úshin azamat BJZQ-nyń internet-resýrsy nemese «elektrondyq úkimet» veb-portaly arqyly birjolǵy zeinetaqy tóleminiń qoljetimdi somasyn anyqtaýy qajet. Eger qordaǵy soma jetkilikti bolsa, onda azamat tirkelgen jeri boiynsha meditsinalyq uiymǵa júginip, dárigerlik komissiianyń birjolǵy zeinetaqy tólemderi esebinen emdelýge jiberý týraly qorytyndysyn alýy qajet», - dedi G.Sársenbaeva.
