25 اقپان كٷنٸ ەمدەلۋگە بەرٸلەتٸن بٸرجولعى زەينەتاقى تٶلەمدەرٸن الۋعا ٶتٸنٸش بەرۋگە ارنالعان پورتال ٸسكە قوسىلادى. بۇل تۋرالى «وتباسى بانك» اق تٶراعاسى لەززات يبراگيموۆا ايتتى, دەپ حابارلايدى قازاقپارات.
«بٷگٸن اتالعان ەرەجە (ەمدەلۋگە بەرٸلەتٸن بٸرجولعى زەينەتاقى تٶلەمدەرٸن پايدالانۋ ەرەجەسٸ) رەسمي تٷردە جارييالانىپ, كٷشٸنە ەنەدٸ. بٸزدٸڭ پورتال 2021 جىلدىڭ 25 اقپانىندا ٸسكە قوسىلادى. سوڭعى جاڭاشىلدىقتاردى ٶزگەرتۋ ٷشٸن بٸزگە ٷش كٷن ۋاقىت قاجەت. باستاپقىدا تٸزٸمگە قوسىلعان كەيبٸر اۋرۋ تٷرلەرٸ سوڭعى ۋاقىتتا الىنىپ تاستالعان بولاتىن», - دەدٸ لەززات يبراگيموۆا ورتالىق كوممۋنيكاتسييالار قىزمەتٸندەگٸ باسپاسٶز مەسليحاتى بارىسىندا.
ال قر دەنساۋلىق ساقتاۋ مينيسترلٸگٸنٸڭ مەديتسينالىق كٶمەكتٸ ۇيىمداستىرۋ دەپارتامەنتٸ ديرەكتورىنىڭ ورىنباسارى گٷلنار سەرسەنباەۆا بٸرجولعى زەينەتاقى تٶلەمدەرٸن ەمدەلۋگە پايدالانۋ قر ازاماتتارىنا قوسىمشا مەديتسينالىق قىزمەتتەر الۋعا مٷمكٸندٸك بەرەتٸندٸگٸن ايتادى.
«ونى الۋ ٷشٸن ازامات بجزق-نىڭ ينتەرنەت-رەسۋرسى نەمەسە «ەلەكتروندىق ٷكٸمەت» ۆەب-پورتالى ارقىلى بٸرجولعى زەينەتاقى تٶلەمٸنٸڭ قولجەتٸمدٸ سوماسىن انىقتاۋى قاجەت. ەگەر قورداعى سوما جەتكٸلٸكتٸ بولسا, وندا ازامات تٸركەلگەن جەرٸ بويىنشا مەديتسينالىق ۇيىمعا جٷگٸنٸپ, دەرٸگەرلٸك كوميسسييانىڭ بٸرجولعى زەينەتاقى تٶلەمدەرٸ ەسەبٸنەن ەمدەلۋگە جٸبەرۋ تۋرالى قورىتىندىسىن الۋى قاجەت», - دەدٸ گ.سەرسەنباەۆا.
