25 adam «Bolashaq» stipendiiasynan aiyryldy. Bul týraly Halyqaralyq baǵdarlamalar ortalyǵynyń prezidenti Ainur Kárbozova aitty, dep habarlaidy "Ult aqparat".
«Shetelde kadrlar daiarlaý jónindegi respýblikalyq komissiianyń kezekti otyrysy ótti. Komissiianyń kún tártibinde eki másele boldy. Birinshi - konkýrstyq irikteýden ótken úmitkerlerge «Bolashaq» halyqaralyq stipendiiasyn taǵaiyndaý týraly, ekinshi - «Bolashaq« halyqaralyq stipendiiasynyń jekelegen ielerin kelisimshart mindettemesin oryndamaýyna bailanysty odan aiyrý týraly. Konkýrstyq irikteýdiń eki kezeńinen sátte ótken 57 úmitkerge stipendiia taǵaiyndaldy», - dedi Ainur Kárbozava otyrystan keiin BAQ ókilderine bergen suhbatynda.
Sonymen qatar ol ekinshi másele boiynsha kelisimshart mindettemesin oryndamaǵan 25 stipendiiatqa qatysty jan-jaqty qaralyp, olardy stipendiiadan aiyrý týraly sheshim qabyldanǵanyn atap ótti.
«Ekinshi máselege qatysty aitar bolsam, ol akademiialyq baǵdarlama aiaqtalǵannan keiin magistr dárejesin almaǵan, sonymen qatar oqýyn aiaqtamaǵan stipendiiattarǵa qatysty boldy. Búgingi komissiia mundai 25 sheshim shyǵardy. Olar kelisimshart mindettemelerin oryndamaǵandary úshin stipendiiadan aiyryldy. Endi olarmen memleket aldyndaǵy bereshekterin ótetý boiynsha jumys júrgiziledi. Atalǵan azamattar oqýlaryna jumsalǵan barlyq shyǵyndardy óteýi tiis», - dedi ol.
