Búgin Nursultan Nazarbaev halyqaralyq áýejaiynda erekshe rekord tirkele jazdady. 24 jastaǵy alyp kúsh iesi Almat Júnisov 26 tonnalyq ushaqty súirep, rekord ornatýǵa talpynyp kórgen bolatyn, dep habarlaidy QazAqparat.
1996 jyly týǵan Almat Júnisov buǵan deiin poiyz lokomotivin súirep, rekord ornatqan eken. Sodan aýyr kólikke degen áýestigi artsa kerek, búgin salmaǵy 26 tonna bolatyn ushaqty súirep kórdi.
Shara Qazaqstan Táýelsizdiginiń 30 jyldyǵy men Tokio tórinde baq synap jatqan qazaqstandyq sportshylarǵa qoldaý kórsetý úshin uiymdastyryldy.
Ushaqpen «arpalysar» aldynda Almat jýrnalisterge shaǵyn suhbat berip, naýryz aiynda 109 tonna bolatyn poiyz lokomotivin qalai súiregenin baiandady.
Bul jolǵy tańdaǵan kóligi - Bombardier Q400 NextGen ushaǵy bolatyn. Áýe kemesiniń biiktigi – 8,4 metr, uzyndyǵy – 32,8 metr, salmaǵy – 26 tonna, qos qanatynyń uzyndyǵy – 28,4 metr.
Al Almat Júnisovtiń salmaǵy – 100 keli, boiy – 174 santimetr edi.
«Tabiǵatymnan boiyma kúsh daryǵan dep oilaimyn. Sony damytý úshin bala kezimnen sportpen shuǵyldanyp, aýyr zattardy kóterýge áýestendim. Búgingidei synaqtarda aiaqqa kúsh kóp túsedi. Eń bastysy, aiaq kúshti ári shydamdy bolýy kerek. Bul joly eki ai boiy daiyndaldym. Ózim aýyr atletikamen besinshi synyptan bastap ainalysamyn, al qazirgi ýaqytta Almatyda fitnes-jattyqtyrýshy bolyp jumys isteimin», - deidi Almat Júnisov.
Áńgime arasynda atlet mamyr aiynda salmaǵy 300 keli bolatyn túieni kóterip, úsh avtokólikti qatar qoiyp, 13 metrge súiregenin eske aldy.
«Búgingi synaqqa burynǵydai uzaq daiyndalǵan joqpyn. Óz kúshime senip turmyn. Qazaqstan boiynsha áli eshkim ushaq súriep kórgen joq», - dedi sportshy shabyttana sóilep.
Degenmen, óz salmaǵynan 260 ese aýyr ushaqty 1 metrden artyq súireýge Almattyń shamasy jetpedi.
Qazaqstandyq «KInES» rekordtar kitabynyń resmi ókili Qýandyq Qudaibergenov talpynystyń esepke alynbaitynyn aitty.
«Qazaqstan aýmaǵynda biz osyndai oqiǵalardy tirkeýge ýákiletti jalǵyz uiymbyz. Menińshe, muny jeńilis deýge kelmeidi. Almat – ataqty sportshy, onyń laqap aty – «titan qazaq». Jigittiń kelesi talpynysy tabysty bolady dep úimttenemiz. Ádette biz úmitkerge úsh áreketten artyq múmkindik bermeimiz. Sondyqtan rekordty tirkeýden bas tarttyq. Ol ushaqty bir metrden asyryp súirei almady. Bul jetkiliksiz», - dedi Qýandyq Qudaibergenov.
Onyń aitýynsha, Almattyń bul talpysyny rekord retinde tirkelýi úshin ushaqty 10 metrge deiin súirep aparýy kerek bolǵan.
«Reseide bir atlet ushaqty 34 metrge deiin súirep barǵan. Biraq ol ushaqtyń salmaǵy 16 tonna edi», - deidi «KInES» ókili.
Almat Júnisov óziniń sátsizdigin jerdiń tegis bolmaýymen bailanystyryp otyr.
«Jer tegis bolmady. Sondyqtan bolar, ushaqty ornyna qozǵasam boldy, artqa tartyp ákete berdi», - dep túsindirgen jas sportshy búgin sátsizdik boldy eken dep, bastaǵan isin aiaqsyz qaldyrmaitynyn aitty.
«Men Almatyda 300 tonna poiyzdy (lokomotivti) súiremekshimin. Oǵan endi tyńǵylyqty daiyndalyp baryp kirisem. Eger súirei alsam, álemdik rekordty jańartam», - dedi Almat.
Tokiodaǵy sportshylardy qoldaýǵa arnalǵan sharanyń ótýine Nur-Sultan qalasynyń jastar saiasaty basqarmasy muryndyq bolǵanyn aita ketý kerek.
