بٷگٸن نۇرسۇلتان نازارباەۆ حالىقارالىق ەۋەجايىندا ەرەكشە رەكورد تٸركەلە جازدادى. 24 جاستاعى الىپ كٷش يەسٸ المات جٷنٸسوۆ 26 توننالىق ۇشاقتى سٷيرەپ, رەكورد ورناتۋعا تالپىنىپ كٶرگەن بولاتىن, دەپ حابارلايدى قازاقپارات.
1996 جىلى تۋعان المات جٷنٸسوۆ بۇعان دەيٸن پويىز لوكوموتيۆٸن سٷيرەپ, رەكورد ورناتقان ەكەن. سودان اۋىر كٶلٸككە دەگەن ەۋەستٸگٸ ارتسا كەرەك, بٷگٸن سالماعى 26 توننا بولاتىن ۇشاقتى سٷيرەپ كٶردٸ.
شارا قازاقستان تەۋەلسٸزدٸگٸنٸڭ 30 جىلدىعى مەن توكيو تٶرٸندە باق سىناپ جاتقان قازاقستاندىق سپورتشىلارعا قولداۋ كٶرسەتۋ ٷشٸن ۇيىمداستىرىلدى.
ۇشاقپەن «ارپالىسار» الدىندا المات جۋرناليستەرگە شاعىن سۇحبات بەرٸپ, ناۋرىز ايىندا 109 توننا بولاتىن پويىز لوكوموتيۆٸن قالاي سٷيرەگەنٸن باياندادى.
بۇل جولعى تاڭداعان كٶلٸگٸ - Bombardier Q400 NextGen ۇشاعى بولاتىن. ەۋە كەمەسٸنٸڭ بيٸكتٸگٸ – 8,4 مەتر, ۇزىندىعى – 32,8 مەتر, سالماعى – 26 توننا, قوس قاناتىنىڭ ۇزىندىعى – 28,4 مەتر.
ال المات جٷنٸسوۆتٸڭ سالماعى – 100 كەلٸ, بويى – 174 سانتيمەتر ەدٸ.
«تابيعاتىمنان بويىما كٷش دارىعان دەپ ويلايمىن. سونى دامىتۋ ٷشٸن بالا كەزٸمنەن سپورتپەن شۇعىلدانىپ, اۋىر زاتتاردى كٶتەرۋگە ەۋەستەندٸم. بٷگٸنگٸدەي سىناقتاردا اياققا كٷش كٶپ تٷسەدٸ. ەڭ باستىسى, اياق كٷشتٸ ەرٸ شىدامدى بولۋى كەرەك. بۇل جولى ەكٸ اي بويى دايىندالدىم. ٶزٸم اۋىر اتلەتيكامەن بەسٸنشٸ سىنىپتان باستاپ اينالىسامىن, ال قازٸرگٸ ۋاقىتتا الماتىدا فيتنەس-جاتتىقتىرۋشى بولىپ جۇمىس ٸستەيمٸن», - دەيدٸ المات جٷنٸسوۆ.
ەڭگٸمە اراسىندا اتلەت مامىر ايىندا سالماعى 300 كەلٸ بولاتىن تٷيەنٸ كٶتەرٸپ, ٷش اۆتوكٶلٸكتٸ قاتار قويىپ, 13 مەترگە سٷيرەگەنٸن ەسكە الدى.
«بٷگٸنگٸ سىناققا بۇرىنعىداي ۇزاق دايىندالعان جوقپىن. ٶز كٷشٸمە سەنٸپ تۇرمىن. قازاقستان بويىنشا ەلٸ ەشكٸم ۇشاق سٷريەپ كٶرگەن جوق», - دەدٸ سپورتشى شابىتتانا سٶيلەپ.
دەگەنمەن, ٶز سالماعىنان 260 ەسە اۋىر ۇشاقتى 1 مەتردەن ارتىق سٷيرەۋگە الماتتىڭ شاماسى جەتپەدٸ.
قازاقستاندىق «كينەس» رەكوردتار كٸتابىنىڭ رەسمي ٶكٸلٸ قۋاندىق قۇدايبەرگەنوۆ تالپىنىستىڭ ەسەپكە الىنبايتىنىن ايتتى.
«قازاقستان اۋماعىندا بٸز وسىنداي وقيعالاردى تٸركەۋگە ۋەكٸلەتتٸ جالعىز ۇيىمبىز. مەنٸڭشە, مۇنى جەڭٸلٸس دەۋگە كەلمەيدٸ. المات – اتاقتى سپورتشى, ونىڭ لاقاپ اتى – «تيتان قازاق». جٸگٸتتٸڭ كەلەسٸ تالپىنىسى تابىستى بولادى دەپ ٷٸمتتەنەمٸز. ەدەتتە بٸز ٷمٸتكەرگە ٷش ەرەكەتتەن ارتىق مٷمكٸندٸك بەرمەيمٸز. سوندىقتان رەكوردتى تٸركەۋدەن باس تارتتىق. ول ۇشاقتى بٸر مەتردەن اسىرىپ سٷيرەي المادى. بۇل جەتكٸلٸكسٸز», - دەدٸ قۋاندىق قۇدايبەرگەنوۆ.
ونىڭ ايتۋىنشا, الماتتىڭ بۇل تالپىسىنى رەكورد رەتٸندە تٸركەلۋٸ ٷشٸن ۇشاقتى 10 مەترگە دەيٸن سٷيرەپ اپارۋى كەرەك بولعان.
«رەسەيدە بٸر اتلەت ۇشاقتى 34 مەترگە دەيٸن سٷيرەپ بارعان. بٸراق ول ۇشاقتىڭ سالماعى 16 توننا ەدٸ», - دەيدٸ «كينەس» ٶكٸلٸ.
المات جٷنٸسوۆ ٶزٸنٸڭ سەتسٸزدٸگٸن جەردٸڭ تەگٸس بولماۋىمەن بايلانىستىرىپ وتىر.
«جەر تەگٸس بولمادى. سوندىقتان بولار, ۇشاقتى ورنىنا قوزعاسام بولدى, ارتقا تارتىپ ەكەتە بەردٸ», - دەپ تٷسٸندٸرگەن جاس سپورتشى بٷگٸن سەتسٸزدٸك بولدى ەكەن دەپ, باستاعان ٸسٸن اياقسىز قالدىرمايتىنىن ايتتى.
«مەن الماتىدا 300 توننا پويىزدى (لوكوموتيۆتٸ) سٷيرەمەكشٸمٸن. وعان ەندٸ تىڭعىلىقتى دايىندالىپ بارىپ كٸرٸسەم. ەگەر سٷيرەي السام, ەلەمدٸك رەكوردتى جاڭارتام», - دەدٸ المات.
توكيوداعى سپورتشىلاردى قولداۋعا ارنالعان شارانىڭ ٶتۋٸنە نۇر-سۇلتان قالاسىنىڭ جاستار ساياساتى باسقارماسى مۇرىندىق بولعانىن ايتا كەتۋ كەرەك.
