Qazaqstanda 2050 jylǵa qarai jumys kúshiniń sany shamamen 11,4 mln adamdy quraidy. Bul týraly Eńbek ministrligi habarlady.
QR Eńbek jáne halyqty áleýmettik qorǵaý ministrliginiń tapsyrysy aiasynda «Eńbek resýrstaryn damytý ortalyǵy» AQ Qazaqstan boiynsha 2050 jylǵa deiin uzaqmerzimdi demografiialyq boljam daiyndady. Statistikalyq derekter men modeldeý negizinde sarapshylar 2030 jylǵa qarai jumys kúshiniń sany 9,7 mln adamǵa jetip, 2040 jyly bul kórsetkish 10,7 milliondy quraidy, al 2050 jylǵa qarai 11,4 millionǵa deiin ósedi dep esepteidi.
Bul rette, boljamdyq negizgi stsenarii boiynsha 2030 jylǵa qarai el halqy shamamen 20,7 mln adamdy quraidy, 2040 jylǵa qarai atalǵan kórsetkish 22,9 mln adamǵa deiin jetip, al 2050 jylǵa qarai 25,5 mln adamǵa deiin ósedi dep kútilýde.
«Boljamǵa sáikes 2030 jylǵa qarai týýdyń joǵary deńgeii men halyqtyń qartaiýyna bailanysty jumys kúshiniń halyqqa paiyzdyq qatynasy 46,7%-ǵa deiin tómendeidi. Bul ekonomikalyq belsendi halyqqa júkteme ósetinin bildiredi», – dedi ERDO Boljamdaý departamentiniń direktory Dmitrii Shýmekov.
Sondai-aq, óz boljamynda ERDO sarapshylary 2050 jylǵa qarai halyq sanynyń óńirlik sáikessizdiginiń kúsheietinin atap ótti. Turǵyndar sanynyń eń kóp ósýi respýblikalyq mańyzy bar qalalarda kútiledi: Nur-Sultan – 2,7 ese (1,9 million), Almaty – 1,8 ese (1,6 million) jáne Shymkent – 2,4 ese (1,5 milllion).
Budan basqa, Mańǵystaý oblysynyń halqy eki esege (1,4 mln adamǵa deiin), Túrkistan oblysynda 500 myńǵa (2,5 millionǵa deiin), al Almaty oblysynda 700 myńǵa (2,8 millionǵa deiin) kóbeiýi yqtimal.
Aǵymdaǵy týý, ólim-jitim jáne kóshi-qon koeffitsientteri turǵysynda Shyǵys Qazaqstan, Qaraǵandy, Qostanai, Soltústik Qazaqstan, Pavlodar jáne Aqmola oblystarynda halyq sanynyń birtindep tómendeýi baiqalatyn bolady. Alaida, mysaly, eger jalpy týý koeffitsienti kórsetilgen aimaqtarda ýaqyt óte kele aitarlyqtai ósip, turǵyndardyń qonys aýdarýy tómendese (etnikalyq qurylymynyń ózgerýine jáne naqty kirisiniń artýyna bailanysty), onda osy aimaqtardaǵy halyq sany turaqtanýy múmkin.
Jalpy, 2050 jylǵa deiingi uzaqmerzimdi demografiialyq boljam mynadai baǵyttar boiynsha jasaldy: halyqtyń jalpy sany, halyqtyń jas quramy, 2050 jylǵa qarai stsenariiler boiynsha jas quramyndaǵy aiyrmashylyqtar, óńirlik sáikessizdikter, óńirler boiynsha halyq sany, demografiialyq qarqyn, jumys kúshiniń sany, jumys kúshiniń qurylymy men ortasha jasy, onyń óńirlik sáikessizdikteri, óńirler boiynsha bólý jáne taǵy basqa.
Sonymen birge, odan ári 2021 jylǵy demografiialyq kórsetkishterdiń naqty ózgeristeri negizinde (halyq sanaǵyn eskere otyryp) osy boljamǵa túzetý jasaý josparlanýda.
«Boljam tórt quramdas bóliktiń negizinde qurylady: halyqtyń bastapqy naqty sany, týý, ólim-jitim jáne halyqtyń kóshi-qon qozǵalysy. Bul 2022 jyldyń ózinde jańa statistikalyq derekter búgingi tańda ózekti bolyp otyrǵan baǵalaýlardan aitarlyqtai erekshelenetin jaǵdai bolýy múmkin degendi bildiredi. Tiisinshe bul demografiialyq boljamdy jańartý qajettiligine ákelýi múmkin», - dep túiindedi Dmitrii Shýmekov.
