QR Ekologiia, geologiia jáne tabiǵi resýrstar ministri Maǵzum Myrzaǵaliev eldegi tómen kómirtekti damýǵa kóshý jumystaryn baiandady, dep habarlaidy QazAqparat.
«Biyl jańa Ekologiialyq kodeks qabyldandy. Munyń óte zamanaýi jáne reformatorlyq qujat ekenin aitqym keledi. Rasynda da óte mazmundy kodeks shyqty. Ondaǵy barlyq novellalardy sapaly jáne ýaqtyly júzege asyra alsaq, oń ózgeristerdi kóremiz. Ekologiialyq kodekste belgilengen barlyq normalar birinshi kezekte taza aýa, qaldyqtardy qaita óńdeý siiaqty ózekti máselelerdi sheshýge baǵyttalǵan. Klimattyq ózgerister problemasyna oralsaq, munda basqasha jumys isteý kerek. Tómen kómirtekti damýǵa kóshý qajet», - dedi Maǵzum Myrzaǵaliev Halyqaralyq jasyl tehnologiialar jáne investitsiialyq jobalar ortalyǵynda ótken jastarmen kezdesýde.
Ekologiia ministri ótken jyly 2050 jylǵa deiingi tómen kómirtekti ekonomika tujyrymdamasyn daiyndaý boiynsha belsendi jumys bastalyp ketkenin eske saldy.
«Bul óte kúrdeli jáne qiyn jumys. Bizdiń barlyq energetikamyzdyń 70% - kómirge tiesili. Sáikesinshe, kómirden bas tartý ońai emes. Bul qarjylyq salymdy qajet etetin qiyn mindet. Biraq bul máselelerdi sheshýimiz kerek jáne 2050 jylǵa deiin tómen kómirtekti ekonomikaǵa aýysyp, 2060 jylǵa qarai – kómirtekti beitaraptyq dep atalatyn birqatar elderge qosylýymyz kerek», - dep atap ótti Myrzaǵaliev.
Aita keteiik, QR Ekologiia, geologiia jáne tabiǵi resýrstar ministri Maǵzum Myrzaǵaliev Dúniejúzilik qorshaǵan ortany qorǵaý kúni qarsańynda ekovolonterlermen, ekologiialyq fakýltetterdiń stýdentterimen kezdesti jáne Qazaqstandaǵy basty ekologiialyq problemalar týraly aityp berdi.
