Foto: Úkimet
Munai óńdeý salasyn damytý tujyrymdamasy sheńberinde munai óńdeý kólemin kezeń-kezeńimen ulǵaitý josparlanýda. Bul týraly Úkimet otyrysynda Energetika ministri Erlan Aqkenjenov málimdedi, dep habarlaidy Ult.kz.
Onyń aitýynsha, 2024 jyldyń qorytyndysy boiynsha munai ónimderin óndirý kólemi 14,52 mln tonnany qurady, osy jyly 14,55 mln tonna ónim óndirý kózdelýde. 2040 jylǵa deiin munai ónimderin óndirýdi 14,52-den 29,2 mln tonnaǵa deiin arttyrý josparlanýda.
Sonymen qatar 2040 jylǵa qarai munai ónimderiniń sapasyn qazirgi ekologiialyq standartynan K4-ten K5+ deńgeiine deiin turaqty túrde jaqsartý jáne syrtqy naryqtarǵa eksporttaý kútilýde.
«2040 jylǵa qarai zamanaýi otyn-munai-himiialyq konfigýratsiiada qýaty 10 mln tonna munai óńdeitin jańa úlken syiymdylyqtaǵy iri zaýytty iske qosý jáne óńdeý qýatyn 30-dan 40 mln tonnaǵa deiin arttyrý josparlanýda. Jańa zaýyttyń óńdeý tereńdigi 95%-dy quraidy. Bul jobalardy júzege asyrý ishki naryqtyń janar-jaǵarmai materialdaryna ósip kele jatqan suranysyn 100% qamtamasyz etýge, sondai-aq munai ónimderin kórshiles elderge eksporttaýǵa múmkindik beredi», — dep atap ótti ministr.
Oqi otyryńyz: Qazaqstannyń munai eksporty qysymda: KTK-ǵa jasalǵan shabýyldar neni ańǵartady?
