Elimiz «jasyl» energetikany óndirýdi odan ári damyta túspek. Sondai-aq, Qazaqstanda jańartylatyn energiia kózderin óndirý 15%-ǵa deiin ulǵaitý jospary tur. Osy oraida otandyq energetika salasyn damytý týraly QR Premer-Ministri Asqar Mamin sala ministrligi aldyndaǵy mindetpen bólisti, dep habarlaidy QazAqparat.
«Qazirgi tańda elimizde polipropilen, polietilen jáne býtadien óndirý boiynsha jalpy quny 11 mlrd dollardy quraityn iri jobalar iske asyp jatyr. Bul jobalardyń salany damytý úshin mańyzy zor. Sondyqtan olardy sapaly iske asyrý, josparly qýatqa shyǵý jáne kásiporyndardy ótkizý naryqtarymen qamtamasyz etý qajet. Qazirgi kezde elde energiia negizinen kómir esebinen óndiriledi. Bul oraida qazirgi zamanǵy kómirtegi beitaraptyǵyna qol jetkizý úshin bizdiń aldymyzda «jasyl» energetikany damytý mindeti tur», - dedi A. Mamin.
Onyń aitýynsha, energetika salasyna qatysty zańnamalyq ózgeristerdi qaita pysyqtaý qajet.
«Búginde jańartylatyn energiia kózderin óndiretin 134 nysan jumys istep tur. Ondaǵy jyldyq óndiristiń jalpy kólemi 3,3 paiyzdy quraidy. 2030 jyly onyń úlesin 15 paiyzǵa deiin ulǵaitý kerek. Bul protsesti jandandyrý úshin jeke óndiristik qajettilikter úshin jańartylatyn energiia kózderi nysandaryn salýǵa qatysty zańnamalyq ózgeristerdi pysyqtaý qajet. Qazaqstannyń elektr energetikasy júiesiniń turaqtylyǵyn qamtamasyz etý úshin otyn-energetika keshenin tezdetip jańǵyrtý jáne jańa qýattardy salý qajet», - deidi Úkimet basshysy.
