Foto: Kp.ru
Ishki ister ministrligi Kóshi-qon qyzmeti komitetiniń tóraǵasy Aslan Atalyqov 2026 jylǵy 1 qańtardan bastap Qazaqstanda jeke kýálikti alǵash ret alý, sondai-aq onyń qoldanylý merzimi aiaqtalǵannan keiin aýystyrý tegin beriletinin málimdedi, dep habarlaidy Ult.kz.
Aslan Atalyqovtyń aitýynsha, memlekettik baj jeke kýálikti alǵash alý kezinde de, sondai-aq qujattyń jaramdylyq merzimi aiaqtalǵan soń josparly túrde aýystyrǵanda da alynbaidy. Ishki ister ministrliginiń bul bastamasy qujat rásimdeý tártibin jeńildetýge jáne azamattardyń qarjylyq júktemesin azaitýǵa baǵyttalǵan.
Aita keteiik, 2026 jylǵy 1 qańtardan bastap Qazaqstanda birqatar qujattardy rásimdeý úshin alynatyn memlekettik baj mólsheri ailyq eseptik kórsetkishtiń (AEK) 3 932 teńgeden 4 325 teńgege ósýine bailanysty ózgeredi. Osyǵan orai pasporttar, jeke kýálikter, júrgizýshi kýálikteri jáne keibir tirkeý qyzmetteri qymbattaidy.
Atap aitqanda:
- - 16 jasqa deiingi balalarǵa arnalǵan 24 betten turatyn pasporttyń quny 17 300 teńge (4 AEK) bolady, bul 2025 jylǵy 15 728 teńgemen salystyrǵanda qymbat;
- - 36 betten turatyn standartty pasport – 34 600 teńge (8 AEK);
- - 48 betten turatyn pasport – 51 900 teńge (12 AEK);
- - jeke kýáliktiń quny – 865 teńge (0,2 AEK), al qujat bir jyl ishinde eki retten kóp joǵalǵan jaǵdaida – 4 325 teńge (1 AEK);
- - júrgizýshi kýáligin rásimdeý – 5 406 teńge (1,25 AEK).
Sonymen qatar týý týraly kýálik alǵash ret berilgen kezde tegin kúiinde qalady, al onyń kóshirmesin alý úshin 0,5 AEK, iaǵni 2 163 teńge tóleý qajet bolady.
