2025 jylǵa qarai memlekettiń ekonomikadaǵy úlesi 14 paiyzǵa deiin azaitylady. Bul týraly Ortalyq kommýnikatsiialar qyzmetindegi baspasóz máslihatynda QR Ulttyq ekonomika ministri Áset Erǵaliev aitty, dep habarlaidy QazAqparat.
Ministrdiń atap ótýinshe, Kásipkerlikti damytý jónindegi ulttyq jobanyń «Básekelestikti keshendi damytý» baǵyty aiasynda taýar birjalaryn damytý, ekonomikany odan ári memleket ieliginen alý jáne salaýatty básekelestik ortany qamtamasyz etý is-sharalary kózdelgen.
«Nátijesinde suiytylǵan munai gazyn taýar birjalary arqyly ótkizý úlesi 80-nen 100 paiyzǵa deiin ulǵaitylady. 2025 jylǵa qarai memlekettiń ekonomikadaǵy úlesi 14 paiyzǵa deiin azaitylady. Memlekettik tapsyrmalar sany 157-den 70 birlikke deiin qysqartylady. Sonymen qatar 20 operatordy taratý jáne qaita uiymdastyrý qarastyrylǵan. Biryńǵai operatorlar sany 1,6 esege qysqarady», - dedi Áset Erǵaliev.
