QR Básekelestikti qorǵaý jáne damytý agenttiginiń tóraǵasy Serik Jumanǵarin elektr energiiasy naryǵyndaǵy básekelestik qalai damitynyn aityp berdi, dep habarlaidy QazAqparat.
«Elektr energiiasy naryǵyndaǵy básekelestik mańyzdy sanalady. Búgingi tańda uiymdastyrylǵan saýda-sattyqta elektr energiiasynyń tek 1 paiyzy satylady. Qalǵanynyń bári ashyq emes tikelei kelisimsharttar boiynsha ótkizilip jatyr. Osyǵan bailanysty 2025 jylǵa deiin uiymdastyrylǵan elektr energiiasy saýdasy kem degende 30 paiyzǵa deiin artady. Sonymen qatar, biz elektr energiiasymen jabdyqtaý naryǵyndaǵy saralaýdy joiýdy josparlap otyrmyz. Munyń bári jyl saiyn 20 milliard biýdjet qarajatyn únemdeýge múmkindik beredi, 31 milliard shaǵyn jáne orta biznes úshin shyǵyn bóligi únemdelip, bizdiń esebimiz boiynsha turǵyn úige kómek retinde 720 millionǵa artady», - dedi S. Jumanǵarin Úkimettiń búgingi otyrysynda.
Spiker básekelestikti damytýdyń taǵy bir baǵyty – birjalyq saýdany damytý ekenin atap ótti.
«Birjalyq saýda durys jolǵa qoiyldy. Búgingi tańda benzin, bitým, kómir, suiytylǵan gaz saýda-sattyǵy iske qosyldy. Jaqynda aviakerosin, dizel otyny, bidai qosylady. Alǵash ret kómirmen birjalyq saýda-sattyq ótkizildi, onda karerlerdiń ózderi jetkizý bazisi bolady. Qarajyra men Shubarkóldiń alǵashqy saýda-sattyǵy tutynýshy úshin únemdiligi 20 paiyzǵa deiin jetetinin kórsetti», - deidi agenttik tóraǵasy.
