QR 2025 jylǵa deiingi aýmaqtyq damý josparynyń jobasy Ulttyq ekonomika ministrliginde túsindirildi, dep habarlaidy "Ult aqparat".
Búgin sarapshylar qaýymdastyǵy men QR Parlamenti depýtattarynyń qatysýymen Talap Talks alańynda ót ótikzilgen dóńgelek ústel barysynda Ulttyq ekonomika vitse-ministri Álisher Ábdiqadyrov QR 2025 jylǵa deiingi aýmaqtyq damý josparynyń jobasymen tanystyrdy.
«Biz ishki jáne syrtqy áleýmettik-ekonomikalyq úrdister men syn-qaterlerge taldaý jasadyq, Qazaqstanǵa áser etetin aýmaqtyq-keńistiktik damýdaǵy halyqaralyq tájiribe men jahandyq úrdister zerdelendi. Jospardyń aǵymdaǵy jobasy Memlekettik josparlaý júiesinde qabyldanǵan ózgeristerdi eskerdi», - dedi Á. Ábdiqadyrov.
Jańa josparda eldiń áleýmettik-ekonomikalyq jáne aýmaqtyq-keńistiktik damýyna eleýli yqpal etetin 6 negizgi baǵyt aiqyndaldy.
Bul aimaqtandyrý, ekonomikalyq qýattyń Qytaiǵa aýysýy, klimattyń ózgerýi, tsifrlandyrý jáne avtomattandyrý, sondai-aq munaiǵa suranystyń tómendeýi.
«Ýrbandalýdyń álemdik trendi bizdiń elde de aiqyn kórinýde. 10 jyl ishinde qala halqynyń ósý qarqyny aýyl halqyna qaraǵanda 8 ese, eldiń barlyq halyqtyń ósý qarqynynan 1,6 ese asyp tústi. Ýrbanizatsiianyń damýy tek qiyndyq retinde ǵana emes, múmkindik retinde de qabyldanýy kerek. Ekonomikalyq esepteýler qala halqy sanynyń 1% ósýi JIÓ-niń 0,27% artýyna alyp keletinin kórsetedi», - dedi Álisher Ábdiqadyrov.
Búgingi tańda Qazaqstanda aglomeratsiialar men basqa da iri qalalardyń ozyq demografiialyq ósýi olardyń serpindi ekonomikalyq damýymen qatar júrýde.
Aglomeratsiialardyń tórt ortalyǵynyń úlesine qazir el halqynyń 22% jáne el JIÓ-niń 33% tiesili.
Al 14 iri qalada (oblys ortalyqtary men Semei q.) sońǵy 10 jylda halyq sany 13,1% - ke ósti.
Olardyń úlesine óńirlik saýdanyń 68%, eldiń ónerkásiptik óndirisiniń 22,3%, negizgi kapitalǵa investitsiialardyń jalpy respýblikalyq kóleminiń 20,1% tiesili.
Bul fakt qalalardyń «ekonomikalyq ósý ortalyǵy» retindegi róliniń artqanyn jáne olardyń arasynda talanttar, resýrstar jáne adami kapital úshin básekelestiktiń kúsheigenin aiǵaqtaidy.
Eldiń aýmaqtyq-keńistikte damýy eldiń aýmaqtyq tutastyǵy, óńirlerdiń derbestigi, ekonomikalyq resýrstardyń shoǵyrlanýy, eldiń ishki jáne syrtqy bailanystylyǵy qaǵidattaryn saqtaýǵa, bazalyq standarttardy qamtamasyz etýge negizdelmek.
Sondai-aq eldiń aýmaqtyq damý josparynda 4 tásil kózdeledi.
Olar: óńirlerdiń básekelestik artyqshylyǵy negizinde «ósý núktelerin» damytý, basqarylatyn ýrbandalý, «adamdar infraqurylymǵa» qaǵidaty boiynsha aýyldyq aýmaqtardy damytý, halyqtyń aýmaqtyq bailanystylyǵy men utqyrlyǵyn qamtamasyz etý.
Olar 11-Ornyqty damý maqsatynyń ólshemderi negizinde anyqtaldy. Árbir tásildiń ózindik damý baǵyty bar.
«Aýyldyq aýmaqtardy damytý «Aýyl – el besigi» jobasynda aiqyndalǵan basymdyqtar sheńberinde jalǵastyrylady. Óńirlik standarttar júiesi de jalǵasyn tabady. Jekelegen iri aýyldardy qala sanatyna aýystyrýda olardyń mártebesin qaita qaraý mańyzdy baǵyt bolmaq. Ekonomikalyq dálizderdi damytý sharasy el aýmaǵynyń ekonomikalyq bailanystylyǵy deńgeiin arttyrady», - dedi ulttyq ekonomikalyq vedomstvo ministriniń orynbasary.
Is-sharaǵa QR Parlamenti Májilisiniń Ekonomikalyq reforma jáne óńirlik damý komitetiniń tóraǵasy Albert Raý, QR Parlamenti Májilisiniń depýtattary Iýliia Kýchinskaia men Ámirhan Rahymjanov, «Aq jol» partiiasy tóraǵasynyń orynbasary Merýert Qazbekova jáne «Bank RBK» AQ Direktorlar keńesiniń tóraǵasy Bolat Jámishev jáne basqalar qatysty.
Ulttyq ekonomika ministrligi eldiń aýmaqtyq-keńistiktik damý saiasatyn kórsetetin strategiialyq qujat bolyp tabylatyn 2025 jylǵa deiingi Aýmaqtyq damý josparynyń jobasyn ázirlep jatqany belgili.
