2025 jylǵa deiin 80 myń qandastyń Qazaqstanǵa oralýyna járdemdesý josparlanǵan. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Qandastardy qabyldaýdyń óńirlik kvotasy Qazaqstan Respýblikasynyń «Halyqtyń kóshi-qony týraly» Zańyna sáikes jumysqa ornalastyrý, turǵyn úimen qamtamasyz etý, mektepke deiingi bilim berý uiymdaryndaǵy oryndar, orta bilim berý uiymdarynyń múmkindikterin jáne qoldanystaǵy zańnama sheńberinde memlekettik qoldaýdyń basqa da sharalaryn usynýdy eskere otyryp, jergilikti atqarýshy organdardyń usynystary negizinde qalyptastyrylady», - dedi ol.
Úkimet basshysynyń dereginshe, 1991 jyldan beri barlyǵy 1 mln 70,3 myń qazaq tarihi otanyna oraldy. 2020 jyldyń qorytyndysy boiynsha 13 myńnan astam adam kóship kelip, qandas mártebesin aldy. Onyń ishinde óńirlik qabyldaý kvotasyna 1 378 qandas engizildi. Biyl etnikalyq qazaqtardyń, jergilikti atqarýshy organdar men Qazaqstan Respýblikasynyń shet elderdegi mekemeleriniń usynystary men ótinimderin eskere otyryp, óńirlik kvota 1 426 qurady.
«Nur Otan» partiiasynyń 2025 jylǵa deiingi «Ózgerister joly: árbir azamatqa laiyqty ómir» sailaýaldy baǵdarlamasyn iske asyrý jónindegi Jol kartasyna sáikes 2025 jylǵa deiin 80 myń qandastyń, onyń ishinde 2021 jyly 12 myń qandastyń qaita oralýyna járdemdesý josparlanýda. Osyǵan bailanysty, sondai-aq shetelden keletin qandastar sanynyń ulǵaiýyn eskere otyryp (jergilikti atqarýshy organdardyń ótinimderiniń negizinde), qandastardy qabyldaý kvotasy qaita qaralatyn bolady», - dedi Asqar Mamin.
