Foto: kazgazeta.kz
QR Ǵylym jáne joǵary bilim ministrligi 2025-2026 oqý jylyna arnalǵan memlekettik bilim berý granttary iegerleriniń tizimin jariialaidy, dep habarlaidy Ult.kz.
QR Prezidenti Qasym-Jomart Toqaevtyń tapsyrmasyna sáikes, ekonomikanyń basym salalary úshin joǵary bilikti kadrlardy daiarlaý maqsatynda bilim berý granttarynyń jalpy sanynyń 60%-y injenerlik jáne tehnikalyq baǵyttar boiynsha bólindi.
Konkýrs qorytyndysy boiynsha memlekettik bilim berý tapsyrysy 99%-ǵa igerildi.
Biyl «Serpin» baǵdarlamasy halyq tyǵyz qonystanǵan óńirlerdiń jastary arasynda úlken qyzyǵýshylyq týdyrdy. Konkýrs nátijesi boiynsha 2 myńnan astam grant iegeri Qazaqstannyń soltústik, shyǵys jáne ortalyq óńirlerindegi aldyńǵy qatarly joǵary oqý oryndarynda bilim alatyn bolady.
«Jalpy «AMANAT» partiiasynyń Sailaýaldy baǵdarlamasyn iske asyrý jónindegi Jol kartasy aiasynda biyl 77 myńnan astam bilim berý granty bólindi. Memleket basshysynyń tapsyrmasy boiynsha sheteldik jetekshi ýniversitettermen seriktestikte jumys isteitin 20-ǵa jýyq joǵary oqý orny stýdentterdi qabyldai bastady. Bul – Qazaqstandy óńirlik bilim haby retinde qalyptastyrý jolyndaǵy mańyzdy qadam», – dedi ministr Saiasat Nurbek.
2025 jylǵy memlekettik bilim berý granttaryn taǵaiyndaý konkýrsyna 113 myńǵa jýyq ótinish qabyldandy, bul ótken jylmen salystyrǵanda 9 myńǵa kóp.
Sondai-aq granttardy bólý kezinde áleýmettik osal toptarǵa jatatyn balalar úshin zańnamada belgilengen kvotalar saqtalady.
Daryndy jastardy qoldaý maqsatynda konkýrssyz beriletin granttar qarastyrylǵan, olar – halyqaralyq olimpiadalar men sporttyq jarystardyń jeńimpazdary.
Budan bólek, ministrlik joǵary bilimge qoljetimdilikti keńeitýge baǵyttalǵan qosymsha tetikterdi engizdi.
Atap aitqanda, Memleket basshysynyń tapsyrmasy boiynsha biyl 5 jasar balaǵa esepshot ashý kezinde bastapqy bilim berý kapitalyn tóleýdi kózdeitin «Keleshek» biryńǵai erikti jinaqtaý júiesi iske qosyldy. Sonymen qatar bul júie barlyq salymshylarǵa memlekettik syiaqy men ekinshi deńgeili bankter men saqtandyrý kompaniialarynyń syiaqysyn tóleýdi qarastyrady. «Keleshek» júiesi boiynsha jinalǵan qarajatty «Ulttyq qor – balalarǵa» jobasynyń qarajatymen biriktirýge bolady.
2024 jyly alǵash ret oqýǵa jumsalatyn shyǵyndardyń bir bóligin jabatyn saralanǵan granttar taǵaiyndaldy, qalǵan somany iegerler óz qarajattary esebinen nemese jeńildetilgen oqý nesiesi arqyly tólei alady. 2025 jyly saralanǵan granttar sany 300 grantty quraidy. Saralanǵan granttar boiynsha konkýrs osy jyldyń qyrkúiek aiynda ótedi.
Alǵash ret merzimdi áskeri qyzmet ótkerip jatqan azamattar úshin 2 010 bilim berý granty bólindi. Bul shara áskeri qyzmetin ótep bolǵan soń áskeri qyzmetshilerdiń áleýmettik beiimdelýin qoldaýǵa jáne joǵary bilim alýǵa teń múmkindik berý maqsatynda qolǵa alyndy.
Grant nátijelerin QR Ǵylym jáne joǵary bilim ministrliginiń resmi saitynan https://www.gov.kz/memleket/entities/sci?lang=kk, sondai-aq áleýmettik jelidegi paraqshalarynan https://t.me/gylym_jogary_bilim jáne Ǵylym jáne joǵary bilim ministriniń resmi paraqshasynan https://t.me/SayasatNurbek, sondai-aq Ulttyq testileý ortalyǵynyń resmi saitynan www.testcenter.kz bilýge bolady.
Memlekettik bilim berý granty týraly kýálik úsh jumys kúni ishinde QR ǴJBM Ulttyq testileý ortalyǵynyń https://grant.testcenter.kz saitynda qoljetimdi bolady.
Joǵary oqý oryndaryna qujattardy tapsyrý 25 tamyzǵa deiin (qosa alǵanda) júzege asyrylady.
