Qazaqstan 2024 jylǵa qarai densaýlyq saqtaý salasyna Jalpy ishki ónimniń 5 paiyzyn bólýdi josparlap otyr, dep habarlaidy QazAqparat.
«2025 jylǵa qarai alǵashqy meditsinalyq-sanitariialyq kómek pen qoǵamdyq densaýlyqqa jumsalatyn shyǵystardyń úlesi Prezident tapsyrmasyna sáikes 60 paiyzǵa deiin jetkiziledi. Bul úshin ministrlik biýdjet qarajatyn josparlaýdyń tiimdiligin nátijege bailanysty arttyrý jumysyn qolǵa aldy. Aldymen, memlekettik biýdjettiń densaýlyq saqtaýǵa jumsalatyn shyǵystary jalpy ishki ónimniń 1,9 paiyzynan 2,8 paiyzǵa deiin ósedi. Bul rette qosymsha qajettilik 1,2 trln teńgeni quraitynyn atap ótý kerek», - dedi Eljan Birtanov Parlament Senatyndaǵy Úkimettik saǵatta.
Ministrdiń aitýynsha, jeke shyǵystardyń úlesi qazirgi deńgeide saqtalýy qajet. Iaǵni jalpy ishki ónimniń 1,4 paiyzynan aspaýy tiis.
«Biýdjettik emes qordyń úlesi (jumys berýshilerdiń aýdarymdary jáne basqalar) boljammen 2024 jylǵa qarai jalpy ishki ónimniń 0,55 paiyzyna deiin jetkiziledi. Osylaisha, Qazaqstan 2024 jyly densaýlyq saqtaýǵa jumsalatyn shyǵystar jalpy ishki ónimniń 5 paiyzǵa deiin jetkiziledi», - dedi ol.
Eske sala ketsek, osy jyldyń maýsym aiynda Bul týraly Úkimet otyrysynda Premer-Ministrdiń birinshi orynbasary - Qarjy ministri Álihan Smaiylov 2025 jylǵa qarai bilim men densaýlyq saqtaý salalaryna JIÓ-niń 10 paiyzyn jumsaý kózdelip otyrǵanyn málim etken edi.
