Premer-Ministrdiń birinshi orynbasary Álihan Smaiylov Májilis ókilderiniń Ulttyq qor qarajatyn paidalaný tujyrymdamasyn qaita qaraý týraly usynysyna jaýap berdi, dep habarlaidy "Ult aqparat".
«Kontrtsikldik biýdjet qaǵidasy tetigi 2023 jylǵa arnalǵan respýblikalyq biýdjetti qalyptastyrý kezinde qoldanylatynyn eskere otyryp, qoldanystaǵy Tujyrymdama sheńberinde tiisti tásilderdiń tiimdiligin qaraý oryndy bolady dep sanaimyz», - delingen depýtattyq saýalǵa berilgen jaýapta.
Sondai-aq, ol Ulttyq qordan bólingen qarajattyń jumsalýyna monitoring jasaityn komissiia bar ekenin eske salady. Qazir bul komissiianyń quramyna Úkimet músheleri, Parlament depýtattary, quqyq qorǵaý organdary men qoǵamdyq uiymdardyń ókilderi kirip otyr.
«Atalǵan komissiiany Esep komitetiniń tóraǵasy basqarady. Komissiia turaqty negizde Ulttyq qordan bólingen qarajattyń maqsatty, zańdy jáne tiimdi paidalanylýyna monitoringteýdi júzege asyrady. Sondai-aq, Ulttyq qordyń qarajaty esebinen qarjylandyrylatyn infraqurylymdyq jáne indýstriialyq jobalardyń iske asyrylýyna monitoring jáne qarjylyq bóligine aýdit júrgizedi. Osylaisha, qazirgi kúni Úkimet Ulttyq qordyń basqarý strategiiasynyń tiimdiligin arttyrý boiynsha turaqty túrde jumys júrgizýde», - dep jazady Álihan Samiylov.
