2023 jyly dárigerlerdiń jalaqysy 561 myń teńgege jetedi. Bul týraly búgin QR Densaýlyq saqtaý ministrliginiń keńeitilgen alqa otyrysynda vedomstvo basshysy Aleksei Tsoi aitty, dep habarlaidy "Ult aqparat".
Densaýlyq saqtaý ministri Memleket basshysy biyldan bastap dárigerlerdiń jalaqysyn kezeń-kezeńimen kóterý mindetin qoiǵanyn eske saldy.
«2023 jylǵa qarai dárigerlerdiń jalaqysy ekonomikadaǵy ortasha jalaqydan eki jarym ese joǵary deńgeige jetedi dep boljanýda. Máselen, 247 myń meditsina qyzmetkeriniń jalaqysyn kóterýge respýblikalyq biýdjette tiisti shyǵystar kózdelgen: 2021 jyly – 222 mlrd teńge, 2022 jyly – 362 mlrd teńge, 2023 jyly - 557 mlrd teńge. Osylaisha, 2021 jyly dárigerlerdiń ortasha jalaqysy shamamen 320 myń teńge bolady. 2023 jyly 561 myń teńgege deiin jetedi. 2021 jyly orta meditsina qyzmetkerleriniń ortasha jalaqysy 173 myń teńge, 2023 jyly 210 myń teńgege jetedi», - dedi Aleksei Tsoi.
