2021-2025 jyldarǵa arnalǵan «Deni saý ult» ulttyq jobasynyń sheńberinde asa tapshy meditsinalyq mamandyqtar rezidentýrasynyń grant sanyn arttyrý josparlanyp otyr. Bul maqsatqa respýblikalyq biýdjetten 39 mlrd 954 mln teńge, jergilikti biýdjetterden 11 mlrd 568,3 mln teńge bólý kózdelgen, dep habarlaidy QazAqparat.
QR Densaýlyq saqtaý ministrliginiń QazAqparat saýalyna bergen jaýabynda osyndai málimet aitylǵan.
Ulttyq joba sheńberinde «Adami kapitaldy damytý, bilim men ǵylymdy jańǵyrtý mindetine» 52 mlrd 122,2 mln teńge qarjy bólý kózdelgen. Respýblikalyq biýdjetten – 40 mlrd 554 mln teńge, jergilikti atqarýshy organdardyń qarajaty esebinen – 11 mlrd 568,3 mln teńge jumsalmaq.
«Bul qarajat 2023-2025 jyldar aralyǵynda qarqyndy terapiiany qosa alǵanda, jetekshi álemdik ortalyqtarda 156 dárigerdi oqytýdy júzege asyrýǵa jumsalady. 2023 jyldan bastap jyl saiyn 52 dáriger osy tásil boiynsha biliktiligin arttyrady. Qarjylandyrý kólemi jyl saiyn 200 million teńgeni quraityn bolady. Qarjylandyrýdyń jalpy somasy 600 mln teńge bolady», - delingen ministrlik baspasóz qyzmetiniń jaýabynda.
Sondai-aq, asa tapshy mamandyqtar rezidentýrasynyń grant sanyn 2022 jyly 1500-den 2025 jyly 3800 grantqa deiin kezeń-kezeńimen ulǵaitý qarastyrylyp otyr. Ol úshin 2022 jyly – 1500 grant, 2023 jyly – 2600 grant, 2024 jyly-3060 grant, 2025 jyly -3800 grant bólý josparda bar.
«Bul úshin respýblikalyq biýdjetten 39 mlrd 954 mln teńge, jergilikti biýdjetterden 11 mlrd 568,3 million teńge bólý josparlanýda.
Ulǵaitý 2023 jyldan bastap josparlanýda. 2023 jyly respýblikalyq biýdjetten 1700 grantqa 9 786 million teńge jáne jergilikti atqarýshy organdar esebinen 900 grantqa 792,4 million teńge bólinedi. 2024 jyly respýblikalyq biýdjetten 1800 grantqa 10 mlrd 947 mln teńge jáne jergilikti biýdjetterden 1260 grantqa 3 mlrd 486,3 mln teńge bólinedi. 2025 jyly respýblikalyq biýdjetten 2000 grantqa 11912 mln.teńge jáne jergilikti biýdjetterden 1800 grantqa 7289,6 mln.teńge bólinedi», - dep jazady mnistrliktiń baspasóz qyzmeti.
