2023 jylǵa deiin politsiia qyzmetkerleriniń jalaqysy 90 paiyzǵa deiin ósedi. Bul týraly Májilistegi Úkimet saǵatynda QR Ishki ister ministri Erlan Turǵymbaev aitty, dep habarlaidy QazAqparat.
«Qyzmetkerlerdiń áleýmettik-materialdyq jaǵdaiyn kóterý boiynsha is-sharalar qabyldanýda. Búginde politsiia qyzmetkerleriniń jalaqysy quqyq qorǵaý organdary arasynda óte tómen. Sondyqtan Memleket basshysynyń tapsyrmasyna sáikes, 2019 jyldan bastap kezeń-kezeńmen jalaqy kóterilýde», - dedi ministr.
Onyń atap ótýinshe, 2023 jylǵa deiin politsiia qyzmetkerleriniń jalaqysyn 50-den 90 paiyzǵa deiin ósirý kózdelgen.
«Osylaisha, serjanttyń jalaqysy 81 myńnan 140 myń teńgege deiin, leitenant jalaqysy 103 myńnan 174 myń teńgege deiin artady», - dedi Erlan Turǵymbaev.
