2022 jylǵa deiin áleýmettik araqashyqtyqty saqtaý talap etilýi múmkin. Bul týraly QR Densaýlyq saqtaý ministri Eljan Birtanov málim etti, dep habarlaidy "Ult aqparat".
«Qazir álemniń keibir elinde jáne Qazaqstanda da koronavirýs infektsiianyń ekinshi tolqyny júrip jatyr. Elimizde ekinshi tolqyn mamyr aiynyń sońynda karantin talaptaryn jeńildetkennen keiin bastaldy. Ókinishke qarai, COVID-19 juqtyrǵandar sany birden artty», - dep jazdy ministr áleýmettik jelidegi paraqshasynda.
Onyń sózine qaraǵanda, jaqynda Garvard qoǵamdyq densaýlyq saqtaý mektebi professorynyń zertteý materialy jariialandy. Onda avtor beta-koronavirýs maýsymy, immýnitet jáne qarsy immýnitet týraly málimetterdi paidalanyp, SARS-CoV-2 koronavirýsynyń taralýyn eseptegen.
«Kúzgi-qysqy kezeńde SARS-CoV-2 qaitalanady dep boljaǵan jáne tolqyndy boldyrmaý úshin 2022 jylǵa deiin ortasha áleýmettik araqashyqtyqty saqtaý talap etilýi múmkin – osy ýaqytqa deiin ujymdyq immýnitet qalyptasady nemese vaktsina ázirlep, ony paidalanýymyz kerek. Qazir SARS-CoV-2-ge immýnitettiń dárejesi men uzaqtyǵy belgisiz, sondyqtan birneshe stsenarii esepke alynǵan. Material málimetteri boiynsha qysqa merzimdi immýnitet (40 apta) jasalýy múmkin, onda indet jyl saiyn qaitalanady. Eger merzimdi immýnitet paida bolsa (104 apta) - eki jylda bir ret shyǵady. Al ómir boiǵy immýnitet – virýstyń eliminatsiiasy bolsa, 2024 jyly qaita órshýi múmkin.Bul jańa infektsiia. Búkil álem ony zertteidi, boljam jasaidy, indetpen kúresý joldaryn qarastyrady», - dedi vedomstvo basshysy.
Onyń paiymynsha, qazir infektsiianyń taralýyn shekteýge baǵyttalǵan sharalar men karantindi jeńildetildetýdiń qaýipsiz qadamdary arasyndaǵy ortaq teńgerimdi taýyp, ony ýaqytsha ómir saltyna engizý qajet.
«Koronavirýs bizdi áli taǵy da ábigerge salary anyq. Sondyqtan, bul sharalarǵa mán berip, muqiiat qaraýǵa májbúrmiz», - dedi Eljan Birtanov.
Budan buryn habarlanǵandai, ministr «jeke karantinge» qatysty pikir bildirgen bolatyn.
