2022 jyldyń 1 qańtarynan suiytylǵan munai gazy elektrondy saýda alańdary arqyly satylady. Bul týraly Májilis depýtattarynyń saýalyna QR Premer-Ministriniń orynbasary Roman Skliardyń jaýabynda aitylǵan, dep habarlaidy "Ult aqparat".
QR Energetika ministrligi 2019 jyldyń 1 qańtarynan bastap taýarlyq gazdyń shekti kóterme baǵasyn óńirlerge bailanysty 3,8 paiyzdan bastap 17,5 paiyz shegine deiin tómendetti jáne osy ýaqytqa deiin kóterilgen joq. Buǵan qosa, ishki naryqqa arnalǵan taýarlyq gazdyń bul baǵasy ózindik qunynan tómen. Suiytylǵan munai gazynyń kóterme baǵasyn Energetik ministrligi eldiń ishki naryǵyna arnalǵan jetkizilim jospary aiasynda ai saiyn qalyptastyryp otyrady», - dedi vitse-premer.
Máselen, onyń atap ótýinshe, 2021 jyldyń 1 jáne 2-toqsanyna suiytylǵan munai gazynyń ishki naryqtaǵy kóterme baǵasy qosylǵan qun salyǵynsyz tonnasyna 38701 teńge mólsherinde bekitilgen. Al 2020 jyldyń 3 toqsanynda suiytylǵan munai gazyna álemdik baǵanyń tómendeýine bailanysty tonnasyna 28 myń teńge bolǵan edi.
«2022 jyldyń 1 qańtarynan bastap toptyq rezervýarlyq qondyrǵylar arqyly turmystyq tutynýshylar jáne memlekettik baǵa retteý saqtalatyn munai gaz-himiia kásiporyndaryna arnalǵan suiytylǵan munai gazy kólemin qospaǵanda, suiytylǵan munai gazynyń barlyq kólemi elektrondy saýda alańdarynda satylatyndyǵyn atap ótken jón. Bul gazdy qaita óńdeýdiń inestitsiialyq tartymdylyǵyn arttyrýǵa, ishki naryqqa jetkiziletin suiytylǵan munai gazyn bólý ashyqtyǵyn kóterýge jáne ishki naryqqa arnalǵan suiytylǵan munai kóleminiń «kóleńkeli» eksportyn tómendetýge múmkindik beredi», - dedi Roman Skliar.
