Búgin Májilistegi Úkimet saǵatynda QR Aqparat jáne qoǵamdyq damý ministri Dáýren Abaev 2022 jyldan elimizdiń basqa da óńirleriniń jumysshy jastaryna jaldamaly páter salynýy múmkin ekenin aitty, – dep habarlaidy «Ult aqparat».
«2019 jyly 3 000 páter Nur-Sultan, Almaty jáne Shymkent qalalarynda jumys isteitin jastarǵa 5 jyl merzimge jalǵa beriletin bolady. Boljanǵan jaldaý aqysy 15 myń teńgeden aspaidy. Al, turǵyn úi alańy keminde 40 sharshy metr. Nur-Sultan qalasynda páterlerge qujattar qabyldaý búgin bastaldy. Almaty qalasy boiynsha 200-den asa ótinim túsken. Aldaǵy 3 jyl ishinde osyndai 9 myń páter beriledi» dedi D.Abaev.
Osy rette Dáýren Abaev bul júzege asyrylyp jatqan sharalarǵa qarap, jastarymyz baspana alý úshin Nur-Sultan, Almaty nemese Shymkentke jappai kóshý kerek eken dep túsinbeýi kerektigin basa aitty.
«Sondyqtan da, mundai páterdi alý shartynyń biri – sońǵy 2 jylda sol qalada turaqty turý kerek. Sonymen birge, eger sizder qoldasańyzdar, jastarǵa arnalǵan jalǵa beriletin baspanany elimizdiń basqa da óńirlerinde 2022 jyldan bastap salý máselesin kóterýge bolady» dedi ministr.
