2022 jyly bastap ákimdikter janynan azamattyq bastamalardy qoldaý ortalyqtary ashylyp, jergilikti biýdjet esebinen qarjylandyrylady, dep habarlaidy QazAqparat.
Bul týraly QR Aqparat jáne qoǵamdyq damý ministrligi Azamattyq qoǵam isteri komitetiniń tóraǵasy Madiiar Qojahmet Aqparat jáne qoǵamdyq damý salasyndaǵy Qoǵamdyq keńestiń otyrysynda aitty.
«Memleket basshysynyń Qazaqstan halqyna Joldaýynda qoiylǵan mindetterde ministrlikke aýyldy jerlerdegi azamattyq bastamalardy qoldaý tetigin ázirleý tapsyryldy. Bul bastama ákimderdiń tikelei sailaýyn engizýdiń, jergilikti ózin-ózi basqarýdyń, biýdjettiń tórtinshi degeiin engizýdiń ózekti jalǵasy bolyp tabylady. Bul sheshimderdiń bári aýyl turǵyndarynyń, iaǵni qazaqstandyqtardyń 40 paiyzdan astam halqynyń múddelerine tikelei bailanysty», - dedi komitet basshysy.
Onyń aitýynsha, jergilikti ózin-ózi basqarýdy odan ári jańǵyrtýdyń mańyzdy faktory – azamattyq mádenietti damytý.
«Bul tańda memleket aýyldaǵy azamattyq bastamalardy shaǵyn grant berý arqyly qoldap jatyr. Jalpy aýyldy jerlerde tirkelgen 12 myńnan astam úkimettik emes uiym bar. Basqa da azamattyq belsendiler shaǵyn grant arqyly óz bastamalaryna qoldaý taba alady. 2019-2021 jyldary bul maqsattarǵa búkil el boiynsha 340 shaǵyn grant bólindi. Osy granttar aiasynda aýyldy jerlerde ár túrli ortalyqtar ashyldy. Onyń ishinde áleýmettik sheberhanalar, az qamtylǵan jáne kópbalaly otbasylarǵa arnalǵan ortalyqtar, bos ýaqyt ótkizetin nysandar, balalar alańdary men sport obektileri, onyń ishinde múmkindigi shekteýli adamdarǵa arnalǵan sportzaldar, qart adamdarǵa arnalǵan salaýatty ómir salty úiirmeleri jáne taǵy basqa ortalyqtar ashyldy», - degen ministrlik ókili aýyldaǵy bastamalardy qoldaýmen budan bylai jergilikti ákimdikter de ainalysatynyn atady. Ol úshin olardyń janynan arnaiy ortalyqtar ashylmaq.
«Aýyldaǵy azamattyq bastamany qoldaýǵa arnalǵan osyndai jobalar kelesi jyly da josparlanǵan. Aýyldy jerelerdegi qoǵamdyq bastamalardy keńinen qamtýǵa bul jetkiliksiz. Osyǵan bailanysty ákimdikterdi osy protsesterge tartý tartý boiynsha belsendi jumys júrgizizilip jatyr. Qazirgi tańda jergilikti ákimdiktermen kelissózdar júrgizilip, kelesi jylǵa olardyń biýdjetteri arqyly azamattyq bastamalardy qoldaý ortalyǵy jumysyn bastaǵaly otyr», - dedi Madiiar Qojahmet.
