Damyǵan memleketter kóshinen qalmaýdyń birden bir joly - sapaly bilim men sanaly tárbie. Bul týraly Jambyl Jabaevtyń 175 jyldyǵyna arnalǵan «Uly dala aqyny» atty halyqaralyq konferentsiiada QR Prezidenti Ákimshiligi basshysynyń birinshi orynbasary Dáýren Abaev aitty, dep habarlaidy QazAqparat.
«Ótken jyldary Ál-Farabi men Abai jyly atalyp ótse, biyl Jambyl jyly toilanýda, kelesi jyldy Ahmet Baitursynulyna arnaý kózdelip otyr. Iaǵni, uly tulǵalarymyzdy ulyqtaý isi júieli túrde júrip jatyr», - dedi Prezident Ákimshiligi basshysynyń birinshi orynbasary.
Onyń atap ótýinshe, búginde «kitap – munaidan da qymbat qazyna».
Sondyqtan kitap oqityn ultty qalyptastyrý baǵytynda otandyq shyǵarmalardy shyǵarý kólemin arttyrý kózdelgen.
«Bizdiń maqsat – azattyqty ardaqtap, Otanymyzdy odan ári nyǵaityp, keler býynǵa tabystaý. Óskeleń urpaq boiyna adamgershilik qasietterdi sińirý. Sapaly bilim men sanaly tárbie – ultymyzdyń uly, urpaǵymyzdyń ulaǵatty bolýynyń kepili. Álem jyldam ózgerip jatqan ýaqytta damyǵan memleketter kóshinen qalmaýdyń birden bir joly – osy. Jambyldan jetken ónegeli ósiettiń de taban tirer tuǵyry, tamyr tartar tereńi – osy ainymas qundylyqtarda. Sondyqtan Jambyl murasyn jańǵyrtyp, jan-jaqty nasihattaý isi kún tártibinen túspeidi», - dedi Dáýren Abaev.
