2022-2024 jyldary áleýmettik salaǵa 26,7 trln teńge bólinedi. Bul týraly QR Parlamenti Senatynyń tóraǵasy Máýlen Áshimbaev aitty, dep habarlaidy QazAqparat.
«Úsh jyl ishindegi túsimderdiń ósýin eskere otyryp, áleýmettik salaǵa jumsalatyn shyǵystardy 30 paiyzǵa ulǵaitý josparlanýda. Jalpy alǵanda, 2022-2024 jyldary áleýmettik salaǵa 26,7 trln teńge bólinedi. Osy qarajat kóptegen áleýmettik máselelerdi sheshýge múmkindik beredi. Mysaly, áleýmettik tólemderdi indeksteý, muǵalimderdiń, dárigerlerdiń, biýdjetten eńbekaqy alatyn basqa da qyzmetkerlerdiń jalaqysyn arttyrý jáne kóptegen áleýmettik nysandar salý kózdelgen», - dedi Máýlen Áshimbaev Senattyń jalpy otyrysynda.
Sonymen qatar ol búgin senatorlar birqatar ózekti máselelerdi kótergenin atap ótti.
«Onyń ishinde aýyl turǵyndaryn sýmen, internetpen qamtamasyz etý, feldsherlik pýnkt jelisin keńeitý máseleleri sóz boldy. Osy oraida Úkimet múshelerinen búgin depýtattar kótergen barlyq máselelerdi eskerýdi suraimyz. Májilis qarap, Prezidentimiz qol qoiǵannan keiin aldaǵy úsh jylǵa arnalǵan respýblikalyq biýdjet el igiligine qyzmet etedi dep senemiz. Aldymyzda Memleket basshysy anyqtap bergen biraz maqsattar bar. Judyryqtai jumylyp, olardy birge júzege asyrýymyz qajet. Bul jumysta Senat depýtattary Úkimetke qajetti qoldaý kórsetýge daiyn», - dedi Senat tóraǵasy.
Aita keteiik, búgingi jalpy otyrysta «2022-2024 jyldarǵa arnalǵan respýblikalyq biýdjet týraly» zań jobasy qaraldy. Senat zań jobasyna birqatar túzetýler engizip, Májiliske qaitarý týraly qaýly qabyldady.
