2021 jyly jyljymaityn múliktiń biryńǵai kadastry iske qosylady. Bul týraly búgin Úkimet otyrysynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Jer qatynastary boiynsha basty úsh problema bar. Eń bastysy – uzaq jáne kúrdeli protsester. Ekinshiden, jer ýchaskeleri shekaralarynyń sáikestigine bailanysty kóptegen shaǵymdar kelip túsýde jáne ár óńirde aýdan deńgeiinde 200-den astam derek qorlary bólek paidalanylýda. Ol aqparattyq qaýipsizdik jáne adami faktor táýekelderine ákeledi. Qazirgi tańda kóptegen koordinattyq júieler qoldanylýda. Al kartografiianyń, geodeziianyń, navigatsiianyń negizgi jetistikterin paidalaný úshin bizge qazaqstandyq koordinattyq júie qajet», - dedi ministr.
Baǵdat Mýsin osy maqsatta «Tsifrlyq Qazaqstan» baǵdarlamasy aiasynda ulttyq keńistik derekteriniń infraqurylymy jobasyn 2024 jylǵa deiin iske asyrý josparlanyp otyrǵanyn aitady.
«Sonymen qatar jer qatynastary salasynda eseptik kadastrynyń 2 túri qoldanylýda. Ol – 200-den astam jer kadasty jáne jyljymaityn múlik tirkelimi derekter qorlary. Jer ýchaskesiniń tehnikalyq sipattamasy, onyń iesi týraly jáne taǵy basqa aqparat osy eki kadastrda qaitalanyp tirkeledi. Olardy biriktirý, jer qatynastary boiynsha protsesterdi avtomattandyrý, qujattar sany men merzimderdi qysqartýǵa múmkindik beredi. Osy maqsatta «Tsifrlyq Qazaqstan» aiasynda jyljymaityn múliktiń biryńǵai kadastry jobasy iske asyrylady. Jyldyń sońynda tehnikalyq jumystar aiaqtalady. Kelesi jyly iske qosamyz», - dedi ol.
Ministr tehnikalyq jaǵdaiy bar jer ýchaskelerin usyný qyzmetin onlain formatta kórsetý Aqtóbe qalasynda pilottyq rejimde iske qosylǵanyn aitty.
«Protsesterdi múldem ózgerttik. Jer ýchaskesin ashyq kadastrlyq karta arqyly onlain túrde tańdaýǵa bolady. Ótinishten bastap buiryq, ákimniń sheshimderi, neshe túrli aktiler men kelisimsharttar, barlyq qujattar elektrondy formatta rásimdeledi. Osy pilottyq joba aiasynda qazirgi tańda Aqtóbe qalasynda eki jer ýchaskesi atalǵan portalǵa salynǵan», - dedi Baǵdat Mýsin.
